ORANJESTAD (AAN): Durante un conferencia di prensa director di AZV Edwin Jacobs a splica cu AZV a duna un presentacion na Comision Permanente di Parlamento di Aruba, cu salud publico como topico.
Esaki den cuadro di e presentacion di e plan 2022 cu ta hiba e nomber di ‘Ban Reforma pa nos Garantiza’.
“Cambionan ta bay wordo implementa e aña aki cu e meta final pa garantiza e fondo di e seguro di AZV pa nos generacion y pa futuro generacionnan”, segun Jacobs.
El a splica cu den cuadro di e peticion di Aruba na Hulanda pa ayudo di likidez relaciona cu e efectonan di e pandemia di COVID-19, a keda dicidi den conseho di Reino riba 15 di Mei 2020 como condicion, cu Aruba mester reduci e gastonan di AZV cu un promedio di 5 miyon florin pa aña.
A base di e decision ey Gobierno a encarga AZV cu e tarea pa busca e recortenan aki den tres campo, esta den e cambionan di e pakete di beneficio, promove eficiencia den e sector di cuido y diseña instrumentonan di maneho pa termino largo.
“AZV na su turno a diseña un modelo cu nos a yama e modelo di 5 ola (5 wave) cu ta consisti pues di 5 parti”.
E prome parti ta pa pospone pago y esaki a tuma lugar den prome luna di e pandemia pa por a mantene AZV su cabez riba awa, segun e director.
El a sigui bisa cu e di dos parti ta limitacion di e beneficionan pa e aseguradonan pafo di e leynan di AZV, mientras cu e di 3 ola ta e limitacion den e ley mes.
E di 4 parti ta temporizacion di cuido, mientras cu e di 5 ta reduccion di tarifa y presupuesto.
Jacobs a splica cu pa loke ta e implementacion, na 2020 a logra un recorte di 35.4 miyon florin conforma e exigencia/condicion cu Hulanda a pone pa Aruba.
“Aña pasa tabata menos, nos no por a alcanza e 60 miyon florin, pero nos a logra yega 36 miyon florin segun nos ultimo proyeccionnan”, segun e director, kende a splica cu e aña aki e condicion ta keda igual, unda cu mester recorta e gastonan cu 60 miyon florin.
“Ta un tarea inmensamente grandi y dificil, unda cu AZV y Gobierno hunto tin cu bay logra esaki y pesey AZV a identifica diferente oportunidad cu lo por yuda nos yega na e 60 miyon florin”, segun Jacobs.
Un presentacion amplio di esaki a wordo duna na Parlamento, despues di cual decisionnan lo bay wordo tuma.
