Famia di DJ Louisville cu suplica pa esnan cu sa di algo bin dilanti

ORANJESTAD (AAN): Diasabra atardi na nan cas na Sabana Basora, famia di e hoben Luis Angel Figueroa Flores kende Diadomingo siman pasa a perde su bida

despues di un caida fatal for di piso halto di Parkinglot di Paseo Herencia, a haci un suplica na e persona responsable pa esaki pa entrega su mes!

   Señora Anahixa Flores kende ta e mama, a indica cu nan ta descarta e teoria cu nan yiu homber cu e nomber artistico DJ Louisville di 20 aña di edad a comete esaki riba su mes.  Tin hopi indicacion cu ta algo otro a socede, y pesey nan ta rogando e persona cu a haci esaki, pa tuma e decision corecto y entrega su mes na autoridad.   Y tambe ta pidi esnan cu por tin informacion corecto, pa duna tip na Tipline di Polis cu ta 111-41.  Segun e mama, nan como famia kier haya un contesta! 

   E famia tin mas di 15 aña na Aruba, y e mama a papia bon Papiamento.  El a splica cu Luis Angel tabata un bon mucha y e no merece di a pasa den tur esaki.  Señora Anahixa a indica cu e sa cu su yiu no tabata su so eynan den e parkinglot, y cu e hoben DJ no tabatin ningun motibo pa haci algo extremo.  E tabata un hoben contento, alegre, y su principal pasion ta musica.

   “Tur esnan cu conocemi, sa cu ami tabata e ‘taxi’ di mi yiu,” e señora a bisa.  Ora e drenta pa bay toca, y na final di su trabao, e mama tabatey pa su yiu.  El a desmenti tambe e prome informenan cu su yiu tin auto y cu esaki tabata staciona den e parkinglot.

   E atardi ey, Luis Angel a toca musica na YOLO cu ta situa den The Cove Mall.  Su trabao ta finalizando 6:00 pm.  Semper e ta para djis banda di caminda pa asina señora Anahixa recoge.  Pero e Diadomingo ey, Luis Angel a bay cu bus pa yega YOLO, debi cu e mama mester a traha.  Pero cu e intencion pa e mama buske atardi ora e caba di traha.   E ultimo biaha cu señora Anahixa a mire tabata e mainta ey pa 8:00 am.

   Atardi, ora cu e mama a yame pa 6:30 pm pa check si e ta cla pa busca na YOLO, Luis Angel no tabata contesta e yamada.

   Mi kier a pidi tur esnan cu por a mira algo, por fabor yama Polis!

   PONE MAN NA CURAZON: Famia ta kere firmemente cu un of mas persona a comete esaki contra nan yiu.  Pesey e mama Anahixa Flores a manda e mensahe aki: “Esun cu por a haci esaki, pone man na bo curazon.  Bo sa masha bon cu Luis Angel no tabata merece esey.  E ta un hoben humilde y contento, di apenas 20 aña.

   “Bo no ta bay tin bida!  Pa e remordimento y bo consenshi lo keda!”

   “Mi ta pidi por fabor na e persona cu por sa, of e persona cu a haci esaki, mi ta rogabo y suplicabo pa papia!  Bisa si ta un accidente of e ta un asesinato.”

   Segun e señora mama, riba Diabierna nan a acudi na Recherche pa mira si nan por haya un update.  Nan a nota cu oficialnan di Polis y Recherche tambe a keda conmovi cu e caso aki.  Famia ta pidi autoridadnan pa nan haci un Autopsia, pasobra te ainda nan no sa kico ta e causa exacto di su morto.

   E investigacion ainda no a finaliza, y e tin su peticion pa nan sigui traha pa asina haya sa tur e berdad tras di morto di Luis Angel.  Nan a divulga cu Recherche tin e smartphone di Luis Miguel confisca pa haci analisis cune.  Ademas a ser splica, cu te ainda no tin ningun testigo cu a bin dilanti pa bisa loke nan a mira socede.  Pesey un suplica ta bay pa esnan cu por a mira algo, pa por fabor yama y duna tip.

   SECURITY CAMERA:  Famia a haya informacion di autoridad, cu e Parking di Paseo Herencia no tin Security Camera.  Pero autoridad a pasa check tur e tiendanan eybanda, y tambe na e otro Mall pa mira si por a capta algo.  Pa soluciona e caso aki, mester di e tip di oro, y si bo sa mas di e asunto, por fabor yama Tipline na 111-41.  Corda cu Polis ta garantizabo cu bo ta keda anonimo.

   Famianan a gradici tanto Ministro Rocco Tjon y tambe Ministro Glenbert Croes cu a duna cooperacion pa asina e wela di Luis Angel por viaha for di Venezuela pa Aruba pa ta presente durante temporada di luto y entiero.

   Tambe ta gradici tur hende cu a manda mensahe di convivencia, y esnan cu ta aprecia Luis Angel, pa tur e apoyo cu ta duna e famia.  Pero e mama kier sa kico a pasa cu su yiu, y e sa cu e caso ta dificil.  Pero e no kier pa e caso keda habri sin solucion.

   Famia a desmenti cantidad di speculacion, esta cu e.o. Luis Angel tabatin conflicto den pasado caba, etc.  Tabatin informe cu Luis Angel a sali na careda for di YOLO cu hendenan coriendo su tras y pesey el a bay den Parkinglot.  Sinembargo e Security Video di YOLO a mustra claramente cu Luis Angel a bandona e establecimento y The Cove Mall su so.  Ningun hende su tras.

   Como cu e mama y ruman ta hopi ‘habri’ cu Luis Angel, nan sa di tur su bida y su actividadnan di trabao.  Nan tabata hasta regularmente bay scuche tambe ta toca, pues e ta un hoben cu na final di su trabao, e no ta keda ‘hang’ hopi na e mesun negoshi despues.

   Nan suplica ta: Si bo a mira algo, por fabor informa Polis di algo.