Situacion desconoci na Aruba awemainta presente den Parlamento --- Expertonan kier contenido Ley di Contabilidad tambe den e Ley --- Integridad di gobernante mester ta basa riba balornan moral
ORANJESTAD (AAN)- Un reunion historico lo inicia awemainta den sala di Reunion di Parlamento di Aruba, ora e concepto di Ley tocante Integridad di Ministronan wordo trata.
DIARIO ayera a discuti e contenido cu por spera di e reunion aki cu expertonan cu a indica cu awe sigur historia politico di Aruba ta conoce un pagina nobo, ora Benny Sevinger como Miembro di Parlamento mester trata e loke mester bira cuadro di integridad di personanan cu ta ocupa e puesto di Ministro di Aruba.
Expertonan a mustra cu pa prome bez den historia di Aruba, un persona cu ta wordo acusa y hasta a wordo detene pa acusacion di corupcion como Ministro, cu ta Benny Sevinger, como Miembro di Parlamento mester trata e documentonan prepara cu mester conduci na e integridad cu ta wordo spera di gobernantenan.
Na final, Benny Sevinger mester vota tambe pa loke ta bira Ley pa Integridad pa Ministernan di Aruba y e base cu tur candidato pa Ministro di Aruba mester honra.
“E tratamento di e Ley aki ta bay trece puntonan elemental pa Aruba na discusion. Central ta bira kico ta nifica integridad den bida y den gobernacion,” expertonan a trece dilanti.
Ora papia di integridad, imediatamente ta bay na e palabra decencia, cu ta e balor mas grandi di Aruba y ta nifica respet, honestidad, husticia, democracia y tur loke ta segun normanan y balornan di e pais.
Informantenan a indica cu den e cuadro aki sigur mester papia di corupcion pero tambe riba otro formanan cu ta haci cu un persona no por cualifica como gobernante di Aruba.
“Gobernante na un estado democratico ta nifica, representacion di Pueblo den Gobernacion,” a wordo mustra.
Hopi bez ta kere cu ta Parlamento so ta representa Pueblo. E Gobierno ehecutivo tambe mester representa Pueblo pasobra e ta indirectamente eligi pa hiba e maneho diario na nomber di Pueblo.
Un punto cu sigur mester bini dilanti ta, e cambionan cu mester wordo haci den ley pa na momento cu un gobernante bay deliberadamente contra interes di Aruba, e pais actua contra e persona concerni.
“Abuso di placa di Pueblo tambe ta un acto contra integridad. Si e gobernante ta abusa di placa di pueblo pasobra no ta su posesion personal, mester persigui e gobernantenan aki y den e caso aki mester uza e Ley di Contabilidad como base,” a wordo mustra.
“Un gobernante cu ta na haltura cu e ta herida un comunidad cu e decision cu e ta tuma, mester baha,” a bini dilanti.
Awe un reunion pisa lo tuma lugar. Un reunion historico pues riba cual DIARIO sigur lo sigui amplia e siman aki.
