Miembronan di CEA a actua di biaha
ORANJESTAD (AAN): Diaranson merdia, despues cu Hof a dicta sentencia den e apelacion di e acusado R., a surgi un situacion den sala di Corte di Husticia, caminda miembronan atento di CEA a actua di biaha.
Menasa victimanan: Despues cu Hof a subi e castigo di R. di 6 pa 8 aña di prison, e famia di R. cu tabata sinta den tribuna di Corte, a lanta y a pasa dilanti e dos hombernan victima y un dama cu tabata cu nan.
Tabatin palabranan tira den direccion di e victimanan. Di biaha, miembronan di CEA a actua y a hala atencion di e famia di R. debidamente mustrando cu loke nan a haci no ta aceptabel.
Keho haci pa menasa: Despues cu e famia di e acusado a sali for di sala di Corte, por a scucha un dama bisa e miembronan di CEA cu esaki no ta promer biaha. E dama a bisa cu hasta tabatin menasa cu pistol y ora nan a bay haci denuncia na warda na Santa Cruz, Polis no a haci nada. E momento ey a conseha e dama y e victimanan pa haci denuncia di biaha na Fiscal di Ministerio Publico cu tabata presente den sala di Corte.
Door cu e sentencia tabata video conference, Fiscal tabata sinta dilanti di e pantaya grandi poni meymey dilanti den sala di Corte y no por a mira tur loke a pasa patras di su lomba.
Na momento cu Fiscal a wordo bisa di e menasa, por a mira cu di biaha el a haci anotacionnan pa asina tuma accion. Esaki ta wordo considera como menasa y lo por spera awor cu Polis lo bay atende e asunto aki debidamente.
E dama tambe a pidi e miembronan di CEA pa acompaña nan ora nan tin cu bay nan auto, pasobra nan ta teme cu e famia lo ta wardando nan pafor. Miembronan di CEA a acompaña e dama y e victimanan pa nan auto pa evita posibel confrontacion.
