Ley di Contabilidad ta urgi Parlamento acerca Colegionan Halto di Estado
*Consulta di emergencia di Aruba mester ta basa riba sostenibilidad
*Rapport di World Bank a confirma necesidad di fondo special Aruba
ORANJESTAD (AAN) — Cada minuut cu pasa na mundo actualmente, ta aumenta e posibilidad cu economia mundial ta sufri un colapso hopi serio mientras inseguridad mundial ta aumenta.
E enemigo mas grandi di economia, ta incertidumbre riba sucesonan cu por afecta un comunidad, loke sigur ta e caso di Aruba cu na e momentonan aki mester tin como su prioridad mas grandi, creacion di un asina yama “buffer zone”pa problemanan financiero cu por presenta.
Pa por atende e situacion actual y e exigencianan di bon gobernacion di un pais, DIARIO ta referi directamente na e contenido di Ley di Contabilidad, cu ta exigi pa e placa cu ta necesario pa garantisa bienestar y sobrevivencia di un Pueblo, ta garantisa den e presupuesto di e pais.
Na e momentonan aki, e prome deber di Parlamento di Aruba den ehecucion di su tarea, ta acercamento mester ta acercamento directo di e Colegionan Halto di Estado cu ta Algemene Rekenkamer Aruba y Raad van Advies.
DIARIO den su calidad di matutino di Aruba tin e deber pa presenta, e pasonan cu un pais mester tuma den un situacion mundial cu cualkier momento por provoca hasta un guera mundial, pa cual Rey abiertamente a bati alarma.
Gobierno di Hulanda y Gobierno di Reino, ta entrega e prueba cu na e momentonan aki e prome interes di gobernacion mester ta, con ta pasa den e crisis cu tin actualmente.
No ta sin mas Hulanda ta dispuesto pa yuda produci su propio alimento, loke pa un pais ta necesidad number uno den proteccion di bida di hende, pues di e ciudadano Hulandes cu e Arubiano ta segun areglo di nacionalidad.
Ora ta papia di peliger di un guera mundial, e prome factor cu democracia ta trece dilanti ta bida di hende, cu ta depende di e proteccion cu e ta ricibi riba tur tereno.
Mester tin seguridad di proteccion teritorial nacional, pero na mes momento mester preveni cu hasta si e guera no concretisa, e factor di inseguridad ta afecta e bienestar di e ciudadano.
Leynan basico di Aruba, cu ta hancra den e huramento gubernamental y di Parlamento y tur cu ta encarga cu bienestar di Aruba, ta exigi pa na e momentonan aki, Pueblo di Aruba realiza e peligro mundial pa su bienestar cu ta aumenta cada momento.
Gremionan mester duna inicio na reunionnan no solamente den nan propio seno pero tambe cu nan miembronan pa mira con conhuntamente ta confronta tur loke por pasa.
DIARIO por entrega e prueba cu e tin autoridad substancial pa den defensa di e bienestar di Aruba y e Arubiano manera tarea di DIARIO ta encera, expresa e necesidad pa Parlamento na un forma concreto atende e forma cu bienestar directo di e Arubiano ta garantisa den circumstancianan cu por presenta.
Aruba ta depende completamente di importacion pa e por pone cuminda ariba mesa a base di e ingredientenan cu Aruba mes no ta produci, manera Hulanda a acenua cu e prioridad cu Reino a duna na produccion di cuminda.
Aruba ta un isla vulnerabel pero strategico den su posicion y hasta su posicion riba mapa di mundo.
Aruba pa su cuminda, pa su awa potabel, pa su salud ta depende di importacion. Aruba pa e por tin placa pa biba, ta depende di turismo cu mester bini di exterior, caminda cada rato instabilidad y guera ta bira mas serio.
E situacion na Merca ta di tal gravedad cu hasta Banco Mundial a ahusta su cifranan di crecemento mundial.
Na e momentonan aki e situacion mundial ta bira cada rato mas peligroso debi na e falta di seguridad riba tur tereno, loke directamente por afecta tambe e cantidad di turistanan cu lo bishita Aruba y asina percura pa e placa necesario pa economia di Aruba funciona.
Na e momentonan aki, e preocupacion mas grandi di periodismo, di mundo politico, comercio, sindicato y tur gremio mester ta, con bida ta continua na Aruba den un situacion sumamente tenso riba tur tereno.
Kico un cada economico mundial of na paisnan cu ta entrega turista na Aruba, lo nifica pa e entrada di Aruba cu mester wordo vigila? Cual ta e reserva cu a mantene te awe pa asina por tin un fondo pa cubri cualkier problema inespera?
Seguridad riba tur tereno, sigur den temporada di horcan cu por crea problemanan serio manera a keda demostra na Aruba, mester ta awor prioridad imediato pa asina a base di e fondonan disponibel di Aruba y cifranan cu atrobe ta prepara, e bienestar directo di e ciudadano di Aruba ta garantisa.
DIARIO ta insisti a base di leynan di bon gobernacion sigur financiero di e pais, consultanan ya mester a wordo hiba cu Colegionan Halto di Estado dor di Parlamento na interes di e Pueblo di Aruba, cu mundo politico mester sirbi como derecho di existencia di politica.
