ORANJESTAD (AAN): Continuando cu e serie di reunionnan oficial durante su bishita na Hulanda,
Minister di Husticia di Aruba, mr. drs. Arthur Dowers, a reuni cu sr. Zsolt Szabó, Secretario di Estado pa Asuntonan di Reino. E dialogo a tuma luga den un ambiente constructivo y di respet mutuo, enfoca riba cooperacion, transparencia y desaroyo sostenibel.
Temanan central durante e reunion a inclui:
- Ondermijning, un menasa serio pa nos sistema democratico y institucional, cu mester combati cu un enfoke integral y colaborativo.
- Estado actual di e cooperacion entre Aruba y Hulanda, tanto den e area di husticia como den fortificacion di e capacidad institucional.
- Digitalisacion, como un pilar pa modernisa e cadena di husticia y pa garantisa un servicio mas eficiente y accesibel pa pueblo di Aruba.
- Cadena di orden y ley na Aruba, cu ta inclui Ministerio Publico, Polis, Landsrecherche y otro entidad relevante.
Durante e reunion, Minister Dowers a comparti su punto principal di maneho nacional den area di husticia, incluyendo su vision pa reforsa integridad, transparencia y efectividad den e cadena di orden publico. Ademas Minister Dowers a presenta su posicion y prioridadnan pa e Landspakket, enfatisando cu e cooperacion di Reino mester ta basa riba respet mutuo y adaptacionnan realistico pa Aruba.
E reunion cu sr. Szabó ta otro stap importante den e esfuersonan di Gabinete AVP-Futuro pa fortalece e posicion di Aruba den Reino, y pa traha pa un Aruba cu ta safe, husto y moderno.
