Segun Jessica Irausquin di SKOA:
ORANJESTAD (AAN): Tin 499 pago escolar habri y SKOA ta haci un yamada na mayornan pa cumpli cu e obligacion escolar di nan yiunan prome cu aña escolar caba.
Den un entrevista cu DIARIO, Hefe di Recurso Humano y Directora suplente di SKOA, señora Jessica Irausquin, a indica cu, considerando cu e situacion financiero na Aruba ta sigui ta un reto pa hopi famia, SKOA ta ofrece flexibilidad pa mayornan cu no por paga den un solo pago.
Segun señora Irausquin, mayornan cu tin dificultadnan financiero of cu tin mas di dos yiu na scol, por haci peticion pa un areglo di pago. Esaki por haci personalmente na oficina di SKOA of por manda un email pa coordina un plan di pago den varios termino.
Señora Irausquin a agrega cu SKOA tin un departamento di cuido cu ta guia mayornan cu tin dificultadnan financiero pa busca apoyo na diferente instancia, manera Departamento di Asunto Social y diferente fundacionnan comunitario.
Segun el a splica, na final di aña escolar tur mucha lo ricibi nan rapport, sin importa si pago escolar a wordo cumpli of no. Sinembargo, muchanan cu nan mayornan no a cumpli cu pago escolar lo ricibi un carta di retiro. Pa reinscribi e mucha pa e siguiente aña escolar, e mayor mester haci tur pago atrasa y e pago nobo.
SKOA ta recorda mayornan cu ultimo dia pa paga pa aña escolar 2025/2026 ta dia 3 di juli 2026. Ultimo dia di scol ta cay dia 14 di juli. Mayornan cu no por haci transferencia bancario, por haci pago directamente na oficina di SKOA riba diamars y diaranson, for di 8:00 di mainta pa 12:00 di merdia y di 2:00 pa 4:00 di atardi.
Pa aña escolar nobo 2026/2027 cu ta cuminsa na augustus, ya desde 1 di mei mayornan por a cuminsa haci peticion pa areglo di pago. E costo anual pa scol ta: Kleuter: 250 Florin. Scol basico: 275 Florin. MAVO: 350 Florin. Riba e sumanan aki ta bin adicional 150 Florin pa airco. E sumanan ta inclui actividadnan organiza pa scol, pero no ta inclui uniform ni material escolar.
Mas informacion tocante pagonan y proceduranan por ser haya riba e paginanan social oficial di SKOA.
