Segun Rudy Lampe di Partido RED:
“Aruba como pais mester acepta cu autonomia tin su limitacionnan”
ORANJESAD (AAN): Rudy Lampe di Partido RED Democratico a duna di conoce cu e unico bentaha di supervision financiero ta pa cuida nos florin y no yega na situacionnan manera di Venezuela na unda mester devalua y pobresa lo bira generalisa. Den un entrevista cu DIARIO, señor Lampe a duna di conoce cu ya tin pobresa na Aruba, pero un supervision financiero lo evita cu esaki sigui crece.
Señor Lampe, a referi na e temporada cu e tabata Minister di Enseñsa, unda cu el a propone pa enseñansa bira un asunto di Reino. Segun e, por haci esaki cu husticia y infrastructura tambe. Esaki lo trece apoyo structural di presupuesto di Hulanda. Y Hulanda e ora lo pone placa pa enseñansa, husticia y infrastructura den e caso aki.
Pero, el a enfatisa, pa haci esaki, mester realmente yega na un acuerdo cu esakinan lo bira asunto di Reino y Aruba como pais mester acepta cu autonomia tin su limitacionnan. El a agrega cu nos no por keda defende autonomia mientras pueblo ta bayendo atras. El a enfatisa cu dado momento mester yega na un acuerdo mescos cu paisnan na Europa a haci pa defende e Euro.
“Asina aki tambe mi ta kere cu nos mester yega na un acuerdo pa bienestar di nos pueblo en general. Pasobra na final, e meta di politica y di tur cos ta pa nos pueblo tin un miho bienestar general”, señor Lampe a enfatisa.
Señor Lampe ta invita pueblo di Aruba en general pa asisti na e charla di Partido RED na unda señor Jayburtt Dijkhoff lo splica e pensamento aki y riba e topico completo di e ley di Reino HOFA. E charla lo tuma luga diasabra awo, 30 di mei, den sala di ATHA, Caya Appeldam 2 na Dakota for di 10 or di mainta pa 12 or di merdia. E charla lo ta gratis.
