Minister Ursell Arends:
ORANJESTAD (AAN): Minister Ursell Arends a duna di conoce cu un tema cu a combersa riba dje cu DTP (Departamento di Transporte Publico) ta cu tin taxistanan cu nan edad no ta permiti nan pa nan traha anochi. Nan ta scoge cu pa traha den dia, pero no anochi y esey ta pone un presion riba e cantidad di taxi disponibel pa ofrece e servicio.
Aworaki cu e 50 permisonan nobo ta bay tin mas taxi adicional ariba caminda y esey tambe lo bay yuda e hecho cu anochi no tin suficiente taxi. Esaki ta algo cu mester atende cu ne, principalmente den e periodo aki cu ta wak cu tin un demanda grandi na hotel, supermercado, restaurant caminda e turistanan ta warda pa mas cu mey ora prome cu un taxi por yega.
"Cu e 50 aki nos ta spera cu esaki por mitiga e problema aki. Pero mester sigui traha tambe pa wak e taxistanan di edad con lo por facilita cu sea nan ta traha den dia y e otronan ta traha den oranan di anochi. Pero esaki ta algo cu mester wordo coordina optimalmente", e minister demisionario a splica.
El a agrega cu e servicio di taxi mester ta primordial pa loke ta trata economia di Aruba y turismo. Pero mester percura pa esaki ta organisa debidamente pa ningun persona wordo afecta.
