Directora di Santa Rosa entusiasma cu proyecto “Floating Farm” y si por realiz'e na Aruba

ORANJESTAD (AAN) – Señora Nathalie Maduro, directora di Departamento di Agricultura,

Cria y Pesca (LVV/Santa Rosa) a comenta tocante su biahe di trabao na Hulanda, aña pasa, unda el a bishita e Proyecto Floating Farm.

E tabata tin e posibilidad di bishita e proyecto aki, y el a keda hopi impresiona cu cuanto oportunidad e modelo ta ofrece. Esnan encarga na Hulanda ta bishitando Aruba pa informa y haci presentacion, y directora di Santa Rosa ta elabora tocante e  proyecto cu e ta desea pa por adapt’e na Aruba.

“Dus, e tin un parti cu ta pa crianza di bestia, nan ta genera diferente producto manera keshi, lechi, lechuga, nan tin un parti cu nan ta recicla e aval di e bestianan, y tin un parti tambe cu ta atrae turismo”, el a duna di conoce.

Señora Maduro a menciona cu hopi di nos turistanan di repeticion ta conoce Aruba tur su atraccionnan caba, y e ta pensa riba kico ta e alternativanan diferente cu Aruba por ofrece na nan.

“E parti di seguridad di cuminda sigur, nos sa cu e limitacionnan cu tereno ta bay keda un problema u lo keda un problema pasobra nos Isla ta un Isla chikito, y ‘however’ bo por wak cu innovacion awendia, ta duna otro oportunidad”, Maduro a expresa.

El a comenta tambe cu ora el cuminza a na Santa Rosa, tabata tin un cunukero cu a menciona esaki, 15 aña pasa. “Ken tabata señor Romulo Geerman cu a bisa cu si nos keda desaroya Aruba asina, no ta bay tin caminda mas pa cria bestia y riba lama nos lo mester hacie” Nathalie Maduro a indica.

Esaki semper a keda den su mente y ora cu el a wak e proyecto “Floating Farm” na Hulanda, el a corda riba dje.

“Mi ta contento y mi ta gradici Minister Arends y Gobierno, cu a duna nos e oportunidad pa a trece nan y pa nan a bin haci un estudio di visibilidad pa Aruba. Den nos caso, locual si nos a haci un peticion ta pa nan cambia e modelo un tiki, y en vez di baca uza cabrito. Esey ta algo cu, vooral pa e lechi y keshi, tin un balor mas halto financiero pa e keshi di cabrito. Nos ta wak cu hopi hende, awendia, ta opta pa bebe lechi di cabrito”, Nathalie a señala.

El a agrega cu nan a wak tur e balornan agrega, y nan tabata tin un sesion unda a wordo presenta kico e modelo ta encera, y durante e siman aki Santa Rosa lo ta bezig cu nan cu diferente reunion, y tambe nan lo bishita posible localidadnan cu, si esaki wordo realiza, na unda e por wordo ubica.