Joe Biden eligi den gara di Covid-19 no por a honra imagen di Obama
- Kamala Harris a tene na e bandera di un Merca cu a perde importancia
- JD Vance e carta di reserva presidencial ta honra imagen Donald Trump
ORANJESTAD (AAN) Na momento cu na 2024, e Pueblo Mericano mester a acudi na urna electoral, DIARIO a para firme den su pronostico cu Presidente Joe Biden no tabata capaz pa representa e recuerdo di Presidente Barack Obama.
Na 2021 e Pueblo Mericano a vota pa presidencia di Joe Biden den circumstancianan historico na Merca y na henter mundo.
Aruba ta uno di e poco paisnan, cu un Gobierno cu a crece den tempo di Pandemia cu a exigi gobernacion maximo y experto den e reto cu un pandemia a provoca.
Na Merca e pandemia a topa cu Presidente Donald Trump, cu su propio ideanan riba e situacion di e pandemia, cu a destrui economia mundial den cual fuente di e forza mundial grandi di Merca ta sconde.
Presidente Joe Biden a gana eleccion y confianza di Pueblo di Merca na un momento cu e pais tabata den necesidad di un Presidente cu manera un paloma blanco a habri ala den e escenario mundial cu retonan cu Joe Biden como Presidente no por a atende y cu a duna mundo e prueba cu como Vice Presidente di Obama, Joe Biden cu su figura trankil, por a ocupa e segundo lugar di gobernacion na Merca, pero no e prome lugar.
E problema serio di Presidente Joe Biden tabata tambe, cu e tabata tene su mes na complacencia politico y a transforma su politica di campaña di “amigo di tur hende”den su seleccion di un Vice Presidente tambe.
Pa funciona como Presidente, Joe Biden no a dicidi pa un figura fuerte pero a dicidi pa un “woman of color”, pues un muher di color, cu lo a entregue votonan di hende di color y di hende muher y nan lealtad.
Te awe na salida di Vice Presidente Kamala Harris, cu tabata tin un bon reputacion den su funcionnan anterior, Harris no ta capaz pa demostra mundo kico realmente e por haci pa Merca si e ta Presidente.
Manera DIARIO a anuncia, esaki a bira directamente e triunfo di Donald Trump, cu a duna un promesa cu e lo “make America great again”.
Durante eleccion Pueblo Mericano a deshaci di e imagen di paloma di paz y a scoge pa e aguila di Donald Trump, cu otro siman oficialmente lo bira Presidente di Merca.
DIARIO, den contacto directo cu informantenan na Merca y un grupo creciente hasta na Aruba, ta topa cu mas y mas sosten pa cambio di maneho na Merca y entrada di Trump, pa porfin bisa cu ta basta, pa problemanan wordo soluciona y maneho concreto soluciona e base di felicidad di hende cu un maneho fuerte mester garantisa.
Merca, cu e constitucion mas pisa na mundo pa derecho humano, ta duna prueba cu e ta sostene e creencia, cu pa hende por ta feliz mester tin un gobernacion capaz pa dirigi un pais, sin palabra cu ta bunita pero bashi.
Condicionnan di tempo ta haci cu inauguracion di Trump ta tuma lugar paden mientras ya rond mundo por topa cu cambio den e situacion actual y esfuerzonan pa pone fin na cantidad di conflicto y peticionnan na Donald Trump pa entre otro interveni den e situacion na Venezuela.
Entrada di Donald Trump lo bira entrada di J.D. Vance, un Vice Presidente hoben cu no ta basa riba necesidad pa honra ni voto pa raza ni sexo, pero si e maneho firme cu ta necesario pa “Make America Great Again”cu lider capaz di regenera economia, cu ta fuente di bienestar di Pueblo y sin necesidad pa uza politica pa ta algo na mundo.
E regresa di Donald Trump como Presidente di Merca, no ta basa riba un paloma blango ficticio pero e forza di aguila, pa dirigi un pais manera un hende lo dirigi nan negoshi, cu ta e exigencia basico di democracia, manera a keda demostra na Aruba cu awe por debolbe Pueblo loke Pueblo a entrega y mas!
