ORANJESTAD (AAN): Diamars mainta Fundacion Anti Droga Aruba (FADA) a tene un conferencia di prensa, relaciona cu lanzamento di nan campaña #Amigo Didi.
Trahador preventivo di FADA Rish-Ann Ammerlaan a trece dilanti cu # Amigo Didi ta un campaña cu tin casi 5 aña di existencia.
“Durante e añanan nos a traha diferente contenido y nos a trece diferente informacion pa asina por concientiza comunidad di Aruba riba e peligernan cu tin ora cu bo ta maneha auto bao di influencia di alcohol”, segun Ammerlaan.
El a splica cu e campaña ta pa luna di September y ta finaliza riba e ultimo dia di e luna.
Ta trata di un campaña di ‘Like-Share-Tag’ y esnan cu participa por gana diferente premio incluyendo weekend stay.
Pa participa bo tin cu subi riba e pagina di Amigo Didi, bo ta like e video cu FADA a ‘share’ Diamars mainta(‘Abo sa ken ta Amigo Didi’).
Bo tin cu share esaki y tag dos amigo den e seccion di comentario.
Ora cu bo cumpli cu e tres pasonan aki, bo ta participando pa gana premio.
“E idea di e campaña aki ta pa nos yega mas cerca di comunidad”.
E video ta un video cu e team di FADA hunto cu e team di Fundacion Zinia a traha door di subi caya y entrevista comunidad, pa wak kendanan tur sa ken ta Amigo Didi, segun Ammerlaan.
El a splica cu nan a ripara cu ainda hopi hende no sa ken ta Amigo Didi.
“Nos meta no ta solamente pa mas hende sa ken ta Amigo Didi, sino tambe pa crea un ‘mind switch’ den comunidad, unda cu na momento cu bo bay cualkier fiesta of celebracion, automaticamente bo ta realiza cu bo tin mester di bo Amigo Didi, si bo tin pensa di bebe alcohol”.
Nos a haci e video den un manera creativo y hopi pret, cu ta dunabo gana di sigui wak e video, segun e trahador preventivo di FADA.
DIARIO a puntra Ammerlaan si e ta haya cu te ainda e campañanan di Amigo Didi di e añanan anterior a yuda.
El a splica cu den e 4 añanan cu e ta traha cu FADA el a ripara cu hendenan den comunidad ta conciente di ken ta Amigo Didi, pero ainda no ta suficiente.
