ORANJESTAD (AAN) – Jesseline Kelly, Relacionista Publico di Departamento di Asunto Social (DAS), a sigui splica den conferencia di prensa, dialuna mainta, a remarca cu, lamentablemente,
den e pago di bijstand cu a pasa diasabra cu a pasa, tur persona cu tabata ricibi e 250 florin, no a haya esaki.
Y esaki, un biaha mas, no ta pa motibo cu DAS a dicidi di kite di e pago di bijstand, pero debi cu nan tin cu ehecuta e ley di bijstand, manera a wordo bisa pa e wordo ehecuta.
Pesey mes, e suma a baha pero e pago ta wordo ahusta na e pago di October 2021. El a agrega cu tur aña e entrega di formulario (school verklaring) ta wordo teni na Oranjestad, pero e seccion di Bijstand su parti administrativo a muda aña pasa pa San Nicolas, y e aña aki a dicidi di hacie eynan, mirando e fluho di cliente cu regularmente tin na Playa, y cu e lugar ta menos espacioso dilanti, pa acapara tur persona.
Na San Nicolas, Jesseline a bisa, e stacionamento pa auto ta mas amplio, y tent a wordo poni pariba, pa asina e fluho di cliente cana mas facil y miho posible.
“Pesey tambe, atrobe e aña aki nos a dicidi di traha segun schedule di entrega, un biaha mas pa evita aglomeracion, y pa e proceso por cana lihe.
E ta fastioso, e ta na San Nicolas, pero mi ta pidi cooperacion. Mi ta sigur cu hopi cliente di San Nicolas pa añanan mester a bin pabao, pa entrega esaki, y e biaha aki nos ta pidi cooperacion di esnan di pabao, pa por fabor bay (DAS) San Nicolas y entrega e formulario”, Jesseline Kelly a subraya.
El a reitera cu por mail e formulario na This email address is being protected from spambots. You need JavaScript enabled to view it. , pero e clientenan toch mester tey presente segun schedule di entrega na DAS su Oficina di San Nicolas.
“Pasobra, e no ta solamente pa entrega e formulario pero e ta un control cu tur aña ta sosode, pasobra pa hopi aña ora di entrega formulario di scol, hopi cos ta bin ariba, e muchanan no ta inscribi mas cerca e mayor cu ta suppose e ta inscribi, e mucha ni ta bay scol mas, of nos tin full un otro scol registra pa e mucha pasobra e mayor a muda e mucha pa otro scol y no a informa Departamento di Bijstand.
Pues diferente sorpresa sa bin dilanti, y pesey mes, nos ta probecha e momento aki pa un control riba bijstand tuma lugar”, señora Kelly a remarca.
