ORANJESTAD (AAN): Vaping por ta birando un problema na Aruba y pesey Fundacion Anti Droga Aruba (FADA) ta pone atencion riba esaki.
Durante un conferencia di prensa Diaranzon mainta trahador preventivo di FADA Rulienne Arends a indica cu FADA a ricibi varios yamada di hendenan preocupa.
No solamente yamadanan di mayornan, pero tambe for di coleganan den veld.
E trahadornan aki den veld sa haya yamada por ehempel for di docentenan of mayornan preocupa riba e asunto di vaping.
“Nos a ricibi yamada di diferente hende cu vaping ta birando un trend, unda cu por ehempel hobennan ta wordo gara den cura di scol cu e aparatonan aki di vaping”.
Esaki segun Arends, kende a indica cu den nan charlanan di humamento lo inclui e topico di vaping.
El a splica cu vaping a cuminza basta tempo pasa como un metodo pa yuda esnan cu tin un adiccion na cigaria, pa asina tiki tiki nan por reduci e cantidad di cigaria cu nan ta huma.
Segun Arends, lamentablemente awor vaping a bira un otro trend y esaki sigur tin di haber cu locual e hobennan ta wak riba social media, unda cu artista y influencers ta mustra con nan ta vape.
“E hobennan ta pensa cu door cu tin sabor di fruta entre otro, cu vaping no ta bay haci daño, pero tin hopi di e sabornan cu ta contene nicotine cu ta pone cu e por causa daño y por causa adiccion”, segun Arends.
El a splica cu pesey FADA tin charlanan prepara riba esaki y varios scol ta pidi pa esaki tambe.
Docentenan entre otro ta nota cu hobennan den klas ta papiando riba vaping y pesey ta importante pa bin cu e charlanan aki prome cu vaping bira un problema mas grandi.
“FADA ta hopi contento cu e leynan contra humamento, cu pronto ta bay drenta na vigor, entre otro cu adultonan no mag huma den auto ora cu tin mucha den e vehiculo y cu ta bay bira prohibi pa bende personanan menor di 21 aña cigaria”, segun e trahador preventivo, kende a indica cu for di basta tempo FADA tabata boga pa un ley asina.
