ORANJESTAD (AAN): Por a nota cu autoridadnan a raporta den e tragedia di siman pasa cu e boto pariba di costa dilanti Fontein,
ta cu un di e obhetonan cu a spula prome na oriya di lama tabata un tas, un jacket salbabida y tambe tanki di gasolin.
For di varios persona, a bin tende cu nan ta spera cu lo por bin cu un campaña unda ta haci suplica na tur piscado cu subi lama, pa por fabor bisti nan jacket di salbabida, for di ora cu bandona oriya of pier, y te ora cu regresa.
Pasobra nunca bo no sa, den un fraccion di seconde ta kico lo socede.
Riba social media a circula suplica di hendenan pa roga tur piscado cu ta subi lama, pa bisti nan vest. Pasobra no sa ta cuanto dolor lo laga atras den caso di emergencia, siendo cu un simpel vest asina por evita lo peor.
A circula potret di un lifevest hopi liviano cu ta wordo bendi riba internet pa menos di $90, pero ta traha y haci su trabao den emergencia. E ta yena automaticamente cu aire, y ta hopi visible y tin reflector riba dje.
