Rulienne Arends di FADA:
ORANJESTAD (AAN): Rulienne Arends di Fundacion Anti Droga Aruba (FADA) a informa den un entrevista cu DIARIO cu e fundacion ta cla pa lansa e di shete temporada di su serie di documentario “Basa riba Bida Real”, un di e programanan mas pidi di FADA.
Segun Arends, e serie ta sali un biaha pa aña, generalmente entre fin di september y luna di october. Durante henter aña FADA ta ricibi pregunta di comunidad tocante si lo tin un temporada nobo y mas episodio.
“Basa riba Bida Real” ta presenta storianan di personanan cu ta comparti nan experiencia personal cu adiccion y, den añanan mas reciente, tambe cu salud mental.
Arends a splica cu antes FADA tabata produci mas episodio pa temporada, pero cu tempo a bira mas dificil pa haya personanan dispuesto pa conta nan storia. E topiconan ta delicado y, door cu Aruba ta un comunidad chikito, tin personanan cu tin miedo pa wordo huzga of mal comprendi.
No obstante, FADA ta sigui haya personanan dispuesto pa comparti nan experiencia y fundacion ta contento di por lansa un temporada nobo.
Segun e feedback y yamadanan cu FADA ta ricibi, e grupo cu mas ta reacciona riba e documentarionan ta adultonan. Tin personanan cu ta tuma contacto cu FADA pasobra nan mes, of un familiar, ta pasando door di un situacion similar.
Tambe tin docente di diferente scol cu ta solicita e episodionan pa uza nan den klas como parti di material educativo, cu ta indica cu hopi hoben toch ta wak e programa educativo aki.
Arends a indica cu, aunke hopi hoben tambe ta mira e documentarionan, e grupo cu mas ta responde y busca contacto cu FADA ta keda adultonan.
