Awe ta start cu Aruba Open 2026 International Paintball Competition na Parkietenbos

President Rayon Henriquez a splica cu ta un trabao grandi

ORANJESTAD (AAN): Durante un conferencia di prensa convoca na e tereno di Hottriggers Paintball Field na Parkietenbos, e president di Aruba Paintball Federation, esta Rayon Henriquez a anuncia cu nan ta cla pa start cu un competencia internacional grandi, entrante awe Diabierna 25 di September 2026.

   Ta trata aki di e “Aruba Open 2026 International Paintball Competition”.  Diferente team local lo ta participando hunto cu esnan den exterior, pa e torneo grandi aki.

   “Ta un gran honor pa mi como presidente di Aruba Paintball Federation oficialmente ta habri Aruba Open 2026 International Paintball Tournament, y e aña aki, Aruba Open lo ta dia 25, 26, 27 di September.

Nos ta prepara pa teamnan local y internacional na Aruba,” Henriquez a declara.

   Aruba Open no ta solamente un torneo, e ta un oportunidad pa pone Aruba riba mapa internacional di paintball, pa mehora e deporte, y alavez laga bishitantenan conoce e hospitalidad y bunitesa di e isla aki.  El a admiti cu setup y organisa un evento di e nivel aki ta exigi hopi trabao y dedicacion, fuera cooperacion.

   “Pesey mi kier tuma e oportunidad aki pa gradici tur nos sponsornan y partnernan cu a kere den nos vision, cu ta yuda nos sigui lucha pa crece, y tambe un gradicimento grandi esencialmente na nos boluntarionan, nos refereenan, nos staffnan, y miembronan di Aruba Paintball Federation.  Hopi biaha e trabao akinan cu nan ta haci no ta visibel, pero sin nan, e evento aki no ta posibel. Na nos teamnan local, mi kier bisa nan pa representa Aruba cu orguyo.”

   E ta duna bon bini na e teamnan internacional cu ta bin Aruba, y bisa cu e isla ta cla pa nan.  “Nos ta un isla chikito, pero cu un curason grandi.”

   Segun Henriquez, nan meta ta pa Aruba Open sigui crece aña tras aña y bira un evento di e hungadornan di diferente parti mundo ta warda y kier bin participa na e evento aki.

   El a invita pueblo completo di Aruba pa bin sostene e deporte di paintball na Outriggers Paintball Field na Parkietenbos, y el a haya sa cu tur hungadornan ta cla.