Rubiella Toppenberg, Trahador Preventivo:
ORANJESTAD (AAN) – Rubiella Toppenberg, Trahador Preventivo di Fundacion Anti Droga Aruba (FADA), den conferencia di prensa a elabora tocante nan siman di bisti na locura, tambe conoci como “Red Ribbon Week”, cu lo tuma lugar otro siman, di 23 pa 27 di October.
Rubiella a duna di conoce cu e aña aki e lema oficial ta “Be kind to your mind”. “Esaki kiermen, cu e aña aki nos ta involucra un tiki loke ta salud mental, den loke ta e meta oficial di esaki cu ta preveni uzo y abuso di droga y alcohol.
“Manera ta conoci, aña pasa nos a saca un lema ganador, cu e aña aki no a involucra den e lema oficial, y esaki ta un conseho pa un amigo: ‘Droga ta bo enemigo’. Nos a involucra esaki mirando cu nos ta haya hopi importante e participacion di tur e personanan cu ta doe mee, durante e siman di cinta cora. E aña aki, mescos cu aña pasa, nos lo scoge un lema ganador pa asina e otro aña e lo wordo involucra den e lema oficial”, Rubiella Toppenberg a menciona.
E ta sugeri pa desde awo cuminza pensa riba un lema cu por uza durante e siman di bisti na locura.
“Pa start e aña aki, dialuna awo 23 di October, nos ta habri nos campaña semper bistiendo na cora. Mi ta spera cu tur hende join me cu un flanel, un camisa of un polo cora, anto na esaki bo por bisa NO na droga y alcohol y eigenlijk duna inicio tambe na loke ta ‘Red ribbon week’ 2023”, Toppenberg a subraya.
Diamars 24 di October, ta dia di bisti mea blou. Semper ta bisti mea cora decora na cada persona su smag, pero e aña aki FADA ta para un rato keto na loke ta “Be kind to your mind” y pa involucra salud mental e dia aki ta bisti un mea blou, y e persona ta dicidi di decora esaki na su smak. Esey ta keda na cada ken pa haci’e.
E mea blou ta para pa kibra stigma y pa duna honor na tur esnan cu ta sintiendo “deblouse”, kiermen cu no ta sintiendo bon.
“Dia 25 ta e dia di mas special di henter e siman, mirando cu esaki ta e dia di premio. FADA ta conoci cu durante e siman di bisti na locura ta parti premio. E premio specifico ta e dia aki. Ta bay tin un ‘coloring contest’. Diahuebs of diabierna FADA tin su posters digital (riba e rednan social) cu por down load y print pa pinta. Of por pasa busca un na FADA tambe”, Toppenberg a señala.
El a haci un yamada na tur scol cu esaki ta bay ta online, si nan tambe kier participa por print nan pa e alumnonan. “Hopi importante ta pone pa bo corda pone bo nomber y edad. E premionan ta bay ta parti den diferente categoria. Tin categoria di 2 te 4 aña, 4-6 aña, 6-12 aña y 18 bay ariba.
