Ivo Valdez, Presidente di OPPA:
ORANJESTAD (AAN) – Presidente di OPPA, e organizacion di Pensionadonan Publico di Aruba, señor Ivo Valdez, tabata presente den e Foro Nacional pa Adulto Mayor, convoca pa Minister Ursell Arends. DIARIO a haya oportunidad pa entrevist’e como representante di un grupo grandi di pensionadonan publico.
Valdez a comenta cu e ta contento cu OPPA a haya oido y cu aunke nan no a yame dialogo social, el a bira un Foro Nacional, cu no a bira un debate ainda, pero Valdez ta spera si, cu e bira un debate.
E ta spera tambe cu tur e presentacionnan cu tabata tin lo a habri wowo di nos gobernantenan, pasobra e poblacion di Aruba berdad ta embeheciendo; y despues cu a haya e proyeccion di señora Helder di CBS, Valdez a mira cu ta bon cu tabata tin e foro, pasobra algo mester haci pa e futuro di nos grandinan.
Ivo Valdez a menciona cu e problema cardinal cu OPPA ta wak, ta falta di placa. “Placa ta e motibo principal pakico e tema aki, cu ta un realidad den e pais aki, e gobernantenan tin miedo di atende cun’e, pasobra e ta encera hopi cen den tur sentido”, Ivo Valdez a bisa.
El a subraya cu loke e ta haya jammer ta cu e ta un tema cu ta toca e Ministerionan di Salud, Asuntonan Social, y Asuntonan di Adulto Mayor, y nan no tabata presente.
“E ta mescos cu nos ta traha riba tres Isla, anto falta esun principal: e Ministerio di Finanzas, pasobra ta di unda e ministerionan ta haya cen. Mester ta un combinacion di tur e cuater ministerionan ey pa nos logra loke nos ta treciendo dilanti, y nos ta spera cu ministernan concerni sinta hunto, y haci algo pa alivia e situacion”, Ivo Valdez a señala.
El a agrega cu for di 1982, 41 aña pasa, Nacionnan Uni a tene un asamblea na Viena, y eynan nan a bisa caba cu e paisnan ta bay tin problema cu embehecimento. Rond mundo! “Anto Aruba cu ta un Isla asina chikito, kico nan ta warda? Pa mitad di e poblacion ta hende grandi? Anto ken ta sostene e pensionadonan? Nos mester trahadornan nobo y pa e grandinan ricibi un pensioen razonable, cu nan por biba un bida trankil den e ultimo fase di nan bida. Nos no mester lubida cu hopi di e ex-trahadornan aki, a presta na e pais aki. Anto, nos ta castiga nan pasobra nan a bira grandi? Nan ta manera un luz cu tabata briya, anto diripiente, di un dia pa otro e switch ta poni off, e claridad no ta duna mas y pesey nan ta pone nan un banda. No. Nos ta hende, bo ta muri como hende. Te den e ultimo fase di bo bida nos tin cu trata nan drechi, anto esey mi ta ripara cu tur e presentacionnan tabata trece e puntonan ey dilanti, anto mi ta spera cu na final nos ta yega na un convenio, un papel cu tin balor su tras”, Ivo Valdez, presidente di OPPA a remarca.
