‘A Mediterranean Night in Provence’
ORANJESTAD (AAN): E Facultad di Hospitality and Tourism Management Studies (FHTMS) di e Universidad di Aruba ta organizando su di cinco aniversario di e cena pa recaudacion di fondo, “A Mediterranean Night in Provence” riba Diasabra 9 di Mei 2026 pa 6:00 pm na Universidad di Aruba.
E evento ta priminti un anochi sofistica, inspira pa e sabornan Mediterraneo y Provencial, ofreciendo bishitantenan un experiencia culinario y cultural unico, cu na mesun tempo ta sostene e desaroyo continuo di educacion di hospitalidad na Aruba.
Mas cu un iniciativa pa recauda fondo, e evento ta sirbi como un experiencia totalmente inmersivo, lidera pa e studiantenan mes. Organiza como parti di e curso di MICE (Meetings, Incentives, Conferences, and Events), e evento ta representa e culminacion di trayecto academico pa cu e curso MICE di e studiantenan, dunando nan e oportunidad pa aplica e conocemento teoretico den un ambiente di bida real. For di e desaroyo inicial di concepto y planificacion te cu e ehecucion y servicio, e studiantenan ta responsable pa tur aspecto di e anochi.
Durante e evento, bishitantenan lo wordo atendi pa studiantenan cu a diseña y prepara e experiencia, brindando nan un entrenamento valioso den hospitalidad y manejo di evento. E iniciativa no solamente ta sostene e facultad, pero tambe ta crea un oportunidad significativo pa studiantenan desaroya nan habilidadnan profesional den un ambiente real.
E anochi ta bira posible pa medio di colaboracion cu Divi & Tamarijn All Inclusive, hunto cu participacion di studiante di Educacion Profesional Basico (EPB) di e sector culinario. E colaboracion aki ta mustra un compromiso comparti pa fomenta educacion practico y fortalece e lazonan den sector di hospitalidad y turismo na Aruba. Riba e potret por mira Chef Frank kende ta cla pa crea magia cu e cuminda.
Un bishitante di un evento anterior a describi e eventonan anterior como “algo magico,” resaltando e combinacion perfecto di cuminda delicioso cu bon biña y espectaculo impresionante. el a enfatiza cu e experiencia tabata inolvidable, añadiendo: “Wak pa bo tey paso e ta un evento cu bo no lo kier perde” el a menciona tambe cu, banda di e experiencia, e ta dunabo un bon sintimento, pasobra e entrada di e evento ta bay bek pa sostene e studiantenan y nan desaroyo educativo.
Participando na e evento aki, bishitantenan no lo solamente contribui na e progreso di educacion di hospitalidad, pero tambe ta sostene activamente e siguiente generacion di profesionalnan di industria mientras nan ta mustra nan talento y dedicacion. Pa haci reservacion, por tuma contact na 561-2456 of 564-3715.
