Ministro Geoffrey Wever:
ORANJESTAD (AAN): Cu tratamento di e prome presupuesto di Algemeen Investerings- en Ontwikkelingsfonds, (AIOF), durante dos dia den Parlamento siman pasa, Aruba a completa un otro fase importante den implementacion di su fondo di inversion.
E proceso a cuminsa cu creacion legal di e fondo AIOF na juli 2026, a sigui cu preparacion y entrega di su prome presupuesto 2026–2027, un ronda amplio di 404 pregunta parlamentario a wordo haci na Gobierno, cualnan tur a wordo contesta, y finalmente un debate extensivo den Parlamento tocante e presupuesto y funcionamento di e fondo.
Minister di Finansa, Asunto Economico y Sector Primario, Geoffrey Wever, ta indica cu e proceso completo ta mustra cu creaccion di AIOF no tabata solamente un decision pa institui un fondo, sino pa establece un sistema legal, financiero y presupuestario pa Aruba por planifica inversionnan publico den varios aña.
“Cu AIOF nos no a crea simplemente un fondo. Nos a crea un instrumento cu mester pasa door di ley, presupuesto, control parlamentario, evaluacion y rendicion di cuenta. E proceso cu nos a sigui for di juli te awe ta exactamente loke bon maneho financiero ta exigi,” minister Wever a expresa.
Landsverordening Algemeen Investerings- en Ontwikkelingsfonds di 9 di juli 2026 a crea oficialmente AIOF. Cu esaki, Pais Aruba a haya un instrumento legal pa structura inversionnan publico na beneficio di desaroyo di pais y pa conecta inversion cu un agenda multianual.
E creacion di un fondo di inversion tabata tambe identifica como un prioridad di maneho dentro di e planificacion presupuestario di Gobierno. Den e Memorie van Toelichting pa presupuesto 2026, institucion di un fondo di inversion ta aparece entre e prioridadnan di maneho, hunto cu otro metanan manera modernisacion di enseñanza, transicion energetico, vivienda pagabel, renobacion urbano y fortalecemento di bienestar y prosperidad.
AIOF ta destina pa financia inversionnan publico na bienestar y desaroyo di Aruba. E recursonan por bini for di Presupuesto di Pais Aruba y por inclui contribucionnan di tercer partidonan. Ademas, e fondo ta conecta cu un Agenda di Inversion Multianual, precisamente pa proyectonan cu preparacion y ehecucion por extende riba mas cu un solo aña presupuestario.
Despues di creaccion legal di e fondo, Gobierno a prepara e prome presupuesto di AIOF pa añanan di servicio 2026 y 2027.
Riba 6 di augustus 2026, Gobierno a entrega oficialmente na Parlamento e Ontwerp-landsverordening tot vaststelling van de begroting van het Algemeen Investerings- en Ontwikkelingsfonds voor de dienstjaren 2026 en 2027. Esey a marca e momento cu AIOF a pasa for di creaccion legal pa su prome aplicacion presupuestario concreto.
E prome presupuesto proponi ta dirigi inversionnan den areanan manera infrastructura, facilidadnan di enseñanza, renobacion di bario, facilidadnan publico, fortalecemento di servicio di Gobierno y desaroyo sostenibel.
Minister Wever ta enfatisa cu e importancia di AIOF ta precisamente cu e instrumento ta permiti Gobierno mira inversion publico mas leu cu un solo aña.
“Un proyecto publico no ta solamente un suma riba papel. Tin preparacion, diseño, evaluacion y ehecucion. Tur esaki ta tuma tempo. AIOF ta duna Pais Aruba un structura pa planifica esaki riba varios aña y pa conecta recurso cu ehecucion y resultado.”
Como parti di e proceso parlamentario, Parlamento a entrega su Verslag riba 14 di september 2026, conteniendo un total di 404 pregunta tocante e prome presupuesto AIOF. Gobierno a prepara contestacion riba tur e preguntanan y a entrega su Nota naar aanleiding van het Verslag, permitiendo cu tratamento parlamentario por sigui.
Pa Minister Wever, e cantidad di pregunta no mester wordo mira como algo negativo, sino como parti di control parlamentario y obligacion di Gobierno pa duna claridad.
“E cantidad di pregunta no ta problema. Transparencia y rendicion di cuenta ta parti di e proceso. Parlamento mester haya e informacion necesario pa por cumpli cu su rol, y Gobierno mester ta prepara pa contesta, splica y aclara,” minister Wever a comenta.
Durante preparacion di e contestacionnan, Gobierno a amplia riba diferente aspecto di AIOF: funcionamiento di e fondo, preparacion y evaluacion di proyectonan, financiamento, control, relacion cu presupuesto di Pais y e manera cu inversionnan lo wordo sigui durante nan ehecucion.
Siman pasa, tratamento di e prome presupuesto AIOF a continua durante dos dia den Parlamento. Den e prome ronda, miembronan di Parlamento a presenta nan preguntanan, observacionnan y preocupacionnan tocante e presupuesto, funcionamiento di e fondo y e proyectonan proponi. Despues, Minister Wever y e otro ministernan di Gobierno presente a haya oportunidad pa responde, splica y pone den contexto e puntonan presenta durante e debate.
E dos dianan di tratamento a permiti un discusion amplio tocante no solamente e cifranan di e presupuesto, sino tambe e filosofia tras di AIOF: di con Aruba mester un instrumento pa inversion multianual, con control ta wordo incorpora, con proyectonan mester wordo prepara y evalua, y con Parlamento ta mantene su rol den autorizacion y control di recursonan publico.
“E debate den Parlamento ta importante, pasobra AIOF no ta un fondo cu mester funciona sin pregunta of sin control. Hustamente lo contrario: nos kier un sistema unda proyectonan mester ta bon prepara, recursonan mester ta autorisa y e resultado mester por wordo sigui.”
AIOF tin su propio presupuesto cu entrada, obligacionnan financiero y gastonan. E presupuesto di e fondo ta forma un parti separa di Presupuesto di Pais Aruba, mientras su cuenta anual ta wordo consolida cu esun di Pais Aruba.
Administracion di e fondo ta cay dentro di e structura financiero di Gobierno, mientras control y rapportage ta forma parti integral di e sistema. Ademas, proyectonan di inversion por wordo evalua riba criterianan manera efectividad, sostenibilidad, ehecutabilidad y alineacion cu maneho publico.
E filosofia tras di esaki, segun Minister Wever, ta pa move e discusion di simplemente “cuanto placa Gobierno ta gasta” pa e pregunta mas importante: con inversion publico ta wordo prepara, financia, controla y transforma den resultado pa comunidad.
“Bon inversion no ta cuminsa cu gasta placa. E ta cuminsa cu prepara un proyecto bon. Y bon maneho financiero no ta termina ora presupuesto ta aproba. E mester sigui te ora proyecto ta ehecuta y resultado ta visibel.”
Den apenas algun luna, e proceso di AIOF a pasa door di diferente fase: creaccion legal di e fondo na juli, preparacion y entrega di e prome presupuesto na augustus, 404 pregunta parlamentario y contestacion di Gobierno na september, y dos dia di tratamento parlamentario na october. Minister Wever ta indica cu cada fase tin su propio funcion den e proceso y cu e siguiente desafio ta mantene e mesun disciplina ora e fondo pasa pa fase di ehecucion.
“Nos a pone e base legal. Nos a prepara e presupuesto. Nos a contesta Parlamento su preguntanan y nos a trata e presupuesto ampliamente. Pero e fondo no ta e meta final. E meta ta inversion cu ta mehora Aruba y resultado cu pueblo por mira, sigui y evalua.”
Cu AIOF, Pais Aruba ta pone un estructura pa planifica inversion publico riba varios aña y pa crea mas continuidad entre vision, presupuesto, proyecto, ehecucion y resultado.
