Expo “Promove Salud y Bienestar” 2022 lo tuma lugar Diasabra awo na Centro Betico Croes

Dahariana Evertsz y Iraida Thijsen ta informa:

ORANJESTAD (AAN) — Den entrevista cu Dahariana Evertsz, funcionario di e Seccion “Health Promotion” di Departamento di Salud Publico y Coordinador di e Expo cu lo tuma lugar Diasabra awo, 24 di September, yama: “Promove Salud y Bienestar” 2022, cu enfoke riba malesanan cronico, hunto cu Iraida Thijsen, a duna nos e siguiente informacion.

E Expo, lo tuma lugar den Centro Deportivo Libertador Betico Croes, na Santa Cruz, di 10 or di mainta pa 5 or di atardi.

Dahariana Evertsz a comenta cu e Expo aki ta dirigi no solamente na personanan cu tin malesa cronico sino tambe riba prevencion. Pues no ta solamente pa hende di edad cu ta sufri di malesanan cronico pero tambe pa hendenan jong, pa nan sa con pa preveni den futuro y pa e siguiente generacionnan.

Tin diferente experto cu ta bay duna informacion, como tambe gruponan di IBiSA, miembronan di DVG, tambe di Salud Hubenil cu ta enfoca riba e programa Scol Saludable, Stichting BOB pa duna informacion tocante cancer na pecho y pa hendenan haci cita tambe. Lo ta presente Famia Planea, FAVI, Fundacion Movemento ta Bida, HAVA, Banco di Sanger, pues tin persona riba tereno di salud cu lo duna nan interes pa esaki, pero tambe pa den futuro por logra mas y yuda otronan tambe. E ta invita henter e comunidad di Aruba pa participa den e Expo di Salud aki.

Iraida Thijsen, Nutricionista di IBiSA, di su parti a duna di conoce cu tur e afdelingnan aki, ta preparando pa e Expo di Salud, e parti di actividad fisico y comunicacion cu ta un parti hopi importante, cu nan lo purba haci riba e dia aki.

IBiSA kier trece hende di tur edad, y lo tin actividad pa tur persona. Pues, no solamente lo duna informacion sino cu e publico por participa den e actividadnan y por hasta participa pa gana un premio, por supuesto, saludable.

Y den cuadro di e celebracion di dia 29 di September cu ta Dia Internacional di Curazon, lo pone enfasis riba con pa cuida e curazon, manera haci actividad fisico, come mas saludable, y riba e tema di colesterol y salo pa pone un tiki mas enfasis riba esaki den nos alimentacion.

“E ta bay ta un dia hopi activo, y pa duna informacion semper nos tey, pero tambe pa haci algo fisicamente. Pasa cerca nos booth, boso ta bon bini, e ta gratis, probecha e momento. No tur ora bo ta haya tur e instancianan aki hunto, pues tuma bo tempo, e no ta den solo. Probecha diasabra pa pasa cerca nos pa haya informacion valioso pa bo salud”, Iraida Thijsen, a menciona.