Expo di University of Toastmasters Club ta habri porta di inspiracion na Sala Safiro

ORANJESTAD (AAN):  Un otro tremendo expo cu a keda instala na Sala Safiro na Biblioteca Nacional Aruba

ta esun di University of Aruba Toastmasters Club. Ronnie Alders, Medewerker Informatie en Advies na BNA ta e persona cu a bin cu e idea pa instala e expo aki.

            El a indica cu e mes ta un miembro di e organisacion aki y di Toastmasters International cu ta un organisacion educativo na Merca cu na 2024 a haci 100 aña. El a bisa cu e club na Aruba mes ta bay haci 10 aña na februari otro aña.  Den e caso aki Sala Safiro ta e luga perfecto pa expone temanan educativo, cultural y un di nan ta encera e parti di comunidad.

            Alders a sigui bisa cu e idea di e exposicion ta pa duna informacion na publico y pa motiva mas hende pa bira miembro. E expo riba su mes no ta uno grandi, el a bisa, pero pa medio di dje por haya un idea kico University of Aruba Toastmasters Club ta ofrece.

            Ronnie tambe a haci un invitacion na comunidad di Aruba pa pasa wak nan exposicion, esun di comunidad y esun di empleado, cu tin como tema Pokemon, pa siña di dje. Si tin organisacionnan cu kier pone nan exposicion tin luga disponibel y pa esaki mester tuma contacto cu Bibliotecario Sra. Yosmar Maduro-Sneek.

            Ronnie Alders tambe a haci un invitacion na comunidad pa sigui bishita Biblioteca Nacional Aruba su Sala Safiro y su sala di estudio, cu ta un joya den e institucion educativo aki.