Expo di ‘Lens di mi Wowonan’ a honra cuatro fotografo local

Dedica na Departamento di Cultura di Aruba

ORANJESTAD (AAN): Diamars anochi a tuma lugar apertura di e expo titula ‘Lens di mi Wowonan’, un biaha mas na Biblioteca Nacional na Playa.  Esaki ta e di 18 expo di potretnan di prensa, y cu ta trabao di e conocido Leo Vrolijk.  Tambe pa di diesocho aña, RBC Royal Bank Aruba NV ta sostene e expo tambe como patrocinador principal.

  Un publico cu diripiente a bira hasta standing-room, a presencia momento cu Hilyann Croes a inaugura e anochi, y a conta cu discurso di e.o. Pierre Rafini di RBC Bank, Toko Winklaar, y tambe Leo Vrolijk.

   E biaha aki, a honra Urig Feliciano (Victor Winklaar Award), Erik Boeldak (Djiespie Franken Award), y dos Lens di mi Wowonan Award a bay pa Michelangelo Arends y tambe Noel Werleman.

   E aña aki e exposicion ta dedica na Departamento di Cultura Aruba (DCA) na ocasion di su 48 aniversario.  Durante casi cinco decada DCA a traha pa conserva, documenta y promove e patrimonio cultural. E dedicacion ey ta haya un significancia ainda mas grandi e aña aki ya cu Aruba tambe ta celebra 70 aña di su Escudo Nacional, 50 aña di Himno y Bandera, y tambe nos a celebra 40 aña di Status Aparte.  Pesey e edicion aki ta, den hopi sentido, un homenahe na identidad mes, na ken nos ta y na e institucion y simbolonan cu ta uni nos como pais.  E premio a wordo ricibi door di John Freddy Montoya.

   E exposicion ‘Lens di mi Wowonan’ ta keda habri henter luna di September na Biblioteca, y ta contene mas di 200 potret di 19 fotografo local.