AHATA a regala studiantenan culinario di EPI nan herment profesional

Un gesto hopi aprecia

ORANJESTAD (AAN(): Aruba Hotel & Tourism Association (AHATA) a haci un regalo na e studiantenan den prome aña di e programa culinario nobo Certified Culinarian di Colegio EPI Horeca.  Un total di nobenta studiante a ricibi e un set di cuchiu profesional, cada un cu 9 pieza.

   Señora Tisa LaSorte, Presidente y CEO di AHATA, a entrega e hermentnan profesional directamente na e alumnonan den presencia di facultad di EPI Horeca. Señora LaSorte a enfatisa con e hermentnan ta mas cu e instrumento principal culinario; nan ta representa e prome paso den e futuro carera di e hobennan.

   Adicionalmente, AHATA a haci entrega di torches pa cushina na nomber di ASD Aruba pa e studiantenan den di tres aña.

   Como un organizacion di dunador di trabao, AHATA ta traha activamente pa e sostenibilidad di Aruba su economia y turismo, cu inicitivanan cu ta apoya enseñansa y yuda sera e “gap” entre educacion y nos mercado laboral.

   AHATA ta felicita e studiantenan pa tuma e paso importante aki den nan formacion profesional y ta duna nan un cordial bon bini den e industria culinario y turistico. Cu e regalo di e hermentnan di calidad halto aki, e asociacion ta inverti den nos talentonan local. Nan ta spera tambe di inspira mas hoben pa continua nan carera y ambicion den e mundo di gastronomia cu gran motivacion y dedicacion.