Exitoso tabata Kids Pier Fishing Tournament na Aruba Nautical Club

ORANJESTAD (AAN): E tabata un atardi fascinante di piscamento, pasa pret, y goza di amistad di tur hende presente riba pier di Aruba Nautical Club.

   Diasabra cu a pasa a tuma lugar e ‘Kids Pier Fishing Tournament’ un biaha mas organiza pa Aruba Nautical Club.  Hobennan cu a reacciona na tempo, a logra inscribi pa asina participa den e atardi dibertido aki.

   Cu e registracion, cada mucha a haya as, reel, potato chips, y juice.  Y tabatin diferente categoria, esta pa mucha homber of mucha muher di 12 te cu 16 aña di edad, y di 7 te cu 11 aña di edad, y di 6 aña of menos.

  Un biaha mas e torneo a resulta di ta exitoso!  Muchanan a goza y grita di alegria ora cu nan a captura pisca.  Mayornan tabata presente pa duna un man y duna nan guia con pa captura loke ta moviendo den lama net bao di e Piernan di Aruba Nautical Club, situa na Balashi.  Pabien na e organizadornan, y por mira cu muchanan a goza un mundo.