Exitoso Proyecto “Educacion Salud Sexual Integral” cu participacion di 12 hoben di Colegio San Antonio

Ghislaine Koeiman, Trahador Social di FPA a splica:

ORANJESTAD (AAN) – Manera ta conoci, un total di 12 hoben di Colegio San Antonio, a participa den un proyecto pa Famia Planea Aruba (FPA) titula: “Proyecto Educacion Salud Sexual Integral”, cu a tuma lugar for di Januari te April 2023.

E proyecto aki ta un iniciativa di un studiante di Inglatera den colaboracion cu “International Plan Parenthood Federation”. E prome stap aki a resulta asina exitoso, cu lo continua como un Proyecto Nacional.

Den entrevista cu Ghislaine Koeiman, Trahador Social na Famia Planea Aruba, el a indica cu e experiencia aki pa e 12 hobennan tabata uno inolvidable, hopi great, y tabata bunita pa wak con e hobennan aki ta papia riba e tema y ta expresa y indica nan pensamento tambe. Tabata 12 hoben super activo, cu mente habri tambe, y hopi dispuesto pa combersa locual por a nota den loke nan a crea y algo cu FPA a ripara, den e hobennan aki, e amor propio (self love) y comunicacion.

Nan ta papia di ta conciente di bo mes y cu no tur hende ta mescos, locual ta hopi bunita pa wak, pasobra nan ta bay enfoca riba esaki, pasobra na momento cu bo ta compronde bo mes, bo por comprende otro hende. Nan a haya guia di Elizabeth cu tabata e investigador, ken a duna nan algun idea y nan mes a scoge kico por funciona pa nan mes como hoben, mas cu claro adaptando na e cultura di Aruba, y asina por a wak cu nan a crea diferente idea.

Por ehemplo, un wega di carta pa asina inicia cu combersacion, pasobra sexualidad, curpa, cambio no ta algo cu ta papia asina sin mas di dje. Otronan a pinta un cometa pa conta un storia cu kizas no por splike den palabra, pero cu pintamento por expresa kico bo kier bisa. Algun a crea algo cu klei, y nan a forma full un magazine hopi in pa e hobennan.