ORANJESTAD (AAN): Den cuadro di Dia Mundial di Libertad di Prensa (World Press Freedom Day), Secretariado di UNESCO Aruba a invita prensa na JFK Center
pa un sesion special unda e miembronan di prensa cu tabata interesa y cu a registra por a combersa y dialoga riba e rol di prensa na Aruba.
UNESCO Aruba a uza e oportunidad aki pa introduci y amplia riba e programanan cu ta cay bao di e area di Comunicacion y Informacion. Esaki tabata bao encargo di Birgit Kreykenbohm, encarga cu e departamento aki.
Tabata un bunita ocasion pa trece dilanti algun inkietud como tambe deseonan pa loke ta e papel di prensa y e trabao di un periodista aki na Aruba.
A bin cu sugerencianan pa UNESCO di e forma aki contribui cu e actualisacion di e gremio y cu mas actividadnan unda por comparti experiencianan y dialoga riba e temanan actual cu ta concerni prensa na nivel local y internacional.
E biaha aki a conta cu participacion di Yorleny Oduber (DIARIO), Farrah Boekhoudt (EA News), Sharina Henriquez (Caribisch Netwerk), Pilar Flores (Bon Dia), Veronica Avila ( XFM 102.7) y Melissa Stamper (Freelance).
Masha danki UNESCO Aruba pa e oportunidad.
