Exitoso proyecto di ‘Bo Salud Nos Prioridad’ di Iglesia Adventista

ORANJESTAD (AAN): Recientemente DIARIO a tuma nota cu un actividad pa check salud di publico tabata ser teni na MFA Savaneta.

   Den un entrevista cu Pastor Pablo Lake di Iglesia Adventista di Siete Dia, na Pos Chikito, el a confirma cu esaki ta e di cuatro biaha cu nan ta activo cu e proyecto “Bo Salud Nos Prioridad”.  Esaki ta caminda Iglesia Adventista di Siete Dia ta trata di sirbi comunidad den diferente area.  Como iglesia nan ta considera nan rol no djis pa e spiritualidad, pero tambe ta sirbi comunidad holisticamente, den sentido pues nan aspecto fisico, emocional, y mental.  E proyecto ta pa sirbi nan mas cu djis e ambito spirtual, pa duna charla di salud, test di salud, y tur loke tin di haber cu e persona su bienestar general.

   DIARIO a nota cu tabatin paña tambe pa yuda esnan den necesidad.  E ta forma parti di e proyecto, cu ta inclui partimento di paña y fruta tambe.

Cada tres luna ta haci esaki.  Pero ademas ta organiza otro actividad pa famia tambe, riba temanan hubenil.  E sede di e Iglesia mes ta patras di edificio ex-Serlimar na Pos Chikito.