Exitoso opendag di Colegio San Agustin MAVO Diasabra ultimo

Den un entrevista cu meneer Jeffrey Kelly, cabesante di Colegio San Agustin MAVO, na San Nicolas, el a duna di conoce cu el a dicidi pa organiza un opendag, Diasabra ultimo.

E meta tabata pa henter e comunidad di Aruba y tur e barionan di San Nicolas ser conoci un tiki mas cu e scol. El a conta cu Colegio San Agustin a wordo funda den añanan 40. Originalmente e tabata Don Bosco School, despues a bira Sint Augustinus College, y den e aña cu a oficializa Papiamento como Idioma di Aruba, a cambia e nomber pa Colegio San Agustin.

El a splica cu, naturalmente, e meta ta pa mercadia e scol, mustra comunidad kico Colegio San Agustin tin pa ofrece como un scol moderno, unda den tur local tin facilidadnan tecnologico cu awendia ta comun.

Un grupo selecta di docente tabata tey pa duna presentacion di diferente materia, entre otro matematica, aardijkskunde, geschidenis, biologia, Nederlands, informatica, pa asina no solamente e muchanan, pero e mayornan haya un idea di con e scol ta brinda su lesnan, y con e docentenan ta duna les.

“Nos tin un cuerpo cu ta hopi jong, hopi dinamico, cu hopi positivismo y bon energia, cu ta cla pa prepara nos muchanan” meneer Kelly a señala, cu hopi satisfaccion y contento di mira e tremendo acogida cu a opendag a haya.

Colegio San Agustin a haya un cantidad hopi grandi di bishitante, cu hasta pa e klas di Hulandes mester a warda pa un siguiente ronda, ya cu nan tabata tin rondanan di mey ora.

E cabesante a splica cu nan a haci un invitacion pa tur scol basico, vooral di San Nicolas y vecindario, tambe algun scol di Santa Cruz, y specialmente pa muchanan di 5de cu 6de klas hunto cu nan mayornan, pa ora nan caba 6de klas y scoge un MAVO scol, nan sa kico Colegio San Agustin tin pa brinda nan.

E docente a comenta cu e temponan aki no ta facil, y hopi hende di San Nicolas, desde cu e refineria a cera, a bay concentra nan mes pabao di brug y scol mester a cuminza lucha pa haya su cantidad di alumnonan, y logicamente ta bon pa comunidad sa ken e scol ta, ken ta para pe, y kico tin pa ofrece como scol, y aki ta unda Colegio San Agustin kier a bende su mes. E scol tin como 200 alumno y e idea ta pa surpasa esaki, pero naturalmente, kedando bao di e cantidad di 300. Idea ta pa nan surpasa y crece como scol.

Cabesante, Jeffrey Kelly, a menciona cu dia 29 di October awo, pues e siman aki mes, examen klas ta cuminza. Nan a prepara e alumnonan di 4de klas bon, y a percura pa trece hende cu ta duna charlanan di motivacion pa encurasha e alumnonan   pa asina prepara nan e miho posible pa drenta den e temporada di examen.

DIARIO a ripara cu tabata reina hopi entusiasmo cerca e bishitantenan tanto mayor como muchanan, y incluso alumnonan cu ta bay scol pabao di brug a enamora di Colegio San Agustin.

Seccion Hubentud den Movecion ta desea e scol hopi exito y cu logra e meta di sigui engrandece. Hopi pabien!