Alumnonan nobo di Guaracosta siñando kico pa haci si acaso boto bolter

ORANJESTAD (AAN): Siman cu a pasa, e aspirantnan di e lesnan di Basis Opleiding Kustwacht (BOK) a finaliza exitoso e partinan di ‘capsize drill’ y tambe cruzamento amfibico di e training.

   Durante e ‘capsize drill’, e aspirantnan mester bay traha pa logra bolter un boto bek riba lama pa e por funciona atrobe.  E meta ta cu e hobennan hunto tin di haci un esfuerzo pa bolter e boto rapidamente pa asina nan por sigui cu nan ruta.

   E parti di Cruzamento Amfibico ta pone e aspirantnan cruza un area riba un cabuya mara di un banda pa e otro.  Nan tin di haci esaki segun e metodo di ‘catcrawl’, pues drumi riba e cabuya, mientras nan pia drechi ta colga abao como ballast, y e pia robez riba e cabuya.  E ta algo di hopi tecnica y poder di musculo.

   E training a tuma lugar na Curacao, y a haya yudana di Frisc Troop Curacao pa ehecuta esaki.