Exitoso nochi di arte a resulta den 15 bunita obra mahestuoso pa subasta na Miami pa recauda fondo pa LCIF

Aliyuri Arends, Presidente di Aruba One Happy Island Lions Club:

ORANJESTAD (AAN): Un anochi yen di inspiracion, creatividad y servicio a bira realidad durante e “LCIF Art Night” organisa pa Aruba One Happy Island Lions Club diabierna ultimo. Durante e evento special aki, artistanan talentoso y miembronan di Lions a reuni pa transforma canvas blanco den obranan di arte. Esaki pa sostene District 35-N y Lions Clubs International Foundation (LCIF). 

Un mencion special ta bay pa e artista Arubiano Elvis Tromp, kende a guia y instrui nan fellow Lions durante e anochi di arte. Cu su experencia, el a comparti conseho y tecnica valioso cu a enrikece e experiencia creativo pa tur participante. 

Presidente di Aruba One Happy Island Lions Club, Aliyuri Arends a expresa cu cada pintura crea no solamente a mustra e talento artistico, sino tambe a representa un compromiso di union pa haci un diferencia real den bida di hende cu tin necesidad. E energia creativo di e anochi a bira un simbolo di compasion, unda arte y servicio a uni cu un proposito mas grandi. 

15 di e obranan di arte crea durante e anochi aki lo wordo presenta durante e proximo 4to Reunion di District 35-N na Miami. Aki, nan lo forma parti di un subasta di arte cu lo contribui directamente na esfuerso di recaudacion di fondo pa LCIF, apoyando comunidadnan rond mundo. 

E iniciativa aki tambe ta mustra apoyo fuerte pa Lion Junior Arends, Coordinador di LCIF pa District 35-N, kende su liderazgo y dedicacion continuo ta guia e mision di servicio y impacto positivo. 

“Aruba One Happy Island Lions Club ta reafirma su compromiso cu creatividad, unidad y servicio como pilarnan pa cambia bida. Hunto nos ta crea. Hunto nos ta sirbi. Hunto nos ta cambia bida”, tabata e palabranan cu s Aliyuri Arends a expresa den un combersacion inoficial cu DIARIO.