Exitoso evento di gala dedica na Aruba teni na Embahada di Reino Hulandes na Washington

ORANJESTAD (AAN): Den fin di siman cu a pasa, na Embahada Hulandes na Washington, D.C., a tuma lugar un evento di gala cu e tema di Aruba!

   Di e forma ey, International Club of DC a tene su Aruba Holiday Gala na Embahada di Reino Hulandes na Washington. Pa prome biaha tanto e embahada y organizacion a tabata anfitrion di un evento dedica na Aruba.

   E International Club of DC tin 47.000 miembro di mas cu 90 nacionalidad y nan ta partner cu mas di 80 embahada na Washington. Nan ta ofrece experiencianan cultural internacional incluyendo arte, musica, baile, teatro y cuminda di rond mundo den un ambiente pa conoce, socialisa y network cu otro profesionalnan internacional.

  E Aruba Gala mester a sosode na maart pero a ser posponi debi na pandemia di Covid-19.  Ministro Plenipotenciario Joselin Croes hunto cu Sanjaya Hettihewa di ICDC a organiza un anochi espectacular cu a promove e isla entre un grupo grandi di profesionalnan na Washington.

   E evento no a costa Land Aruba nada paso ICDC ta bende tickets pa atende su eventonan, tickets pa e Aruba Gala a cuminsa na $75 pa persona. Papiamento Rum a patrocina bebidanan pa e anochi ameno y e highlight di musica Arubano tabata e ora loco cu musica carnavalesco.

   E anochi a goza di artistanan musical Arubano Edjean Semeleer y Chris Kross. Aruba Tourism Authority North America Director Ed Malone tabata na e evento hunto cu Kim Riddle y ATA a duna un bunita presentacion di nos dushi isla y tur huesped a ricibi un gift bag cu brochures promoviendo nos isla. Maureen Bunyon periodista Arubana-Americana di television y co-anchor na Washington pa mas cu 22 aña tabata na e gala como tambe Dr. Edward Cheung ingeniero Arubano di NASA y su distinguida esposa.

   Keshi yena, carni stoba, quesillo y dulce de leche den forma di mapa di Aruba tabata algun di e specialidadnan local cu por a disfruta di dje. E anochi a conta cu presencia di diplomaticonan di diferente pais y Aruba a resalta den circulonan importante na Washington.

   Parlamentario Miguel Mansur kende tabata na e capital Americano pa un conferencia internacional di lidernan LGBTQ tambe a atende Aruba Gala hunto cu su colega MP Melissa Gumbs di St. Maarten kende tambe ta na e conferencia.