Giovanni Arendsz a keda nada impresiona
ORANJESTAD (AAN): E conocido personahe local, Giovanni Arendsz a keda babuca pa mira e rumbo con servicio di emergencia na Aruba ta bayendo. Y loke mas a desapunt’e, ta cu net na Servicio di Emergencia na ImSan na San Nicolas cu semper e tabata regarda como un di e mihornan na Aruba, a djis lag’e y su yiu na caya recientemente den un caso di emergencia.
E no kier realmente punta dede riba e personal trahando e atardi pa anochi ey, pero kier mustra cu e momento a yega pa busca mas Docter pa labora den Servicio di Emergencia riba e isla aki.
Arendsz a indica cu Diamars siman pasa su yiu a bira basta malo, y mesora el a hibe pa Servicio di Emergencia di ImSan. E ta un lugar unda semper Arendsz a haya bon trato di enfermeronan y demas personal.
Sinembargo el a keda desapunta cu el a yega 6:30 pm cu su yiu, y poco-poco a cuminza nota cu nada ta pasando. Ora cu el a nota cu ningun otro pashent mas ta hayando yudanza, el a bay na e Balie pa puntra, y e dama na bentana na forma amable a bise cu tin hopi pashent y ta solamente 1 Docter tin pa atende.
Arendsz a bay sinta bek cu su yiu yen dolor. Asina 1 ora a pasa, sigui pa 2 ora, y a yega 3 ora cu nan ta den sala ta wardando. Asina a yega cu 4 ora a pasa. Pues e ora ya tin 10:30 pm y ainda su yiu chikito di 5 aña no a wordo atendi.
Hasta e personal na warda a cambia, bay cas y un grupo nobo di personal a yega. E ora pa 10:30 pm, Arendsz a dicidi bay puntra kico ta pasando. Nan a contest’e cu ta 1 Docter so tin, y no tin suficiente personal.
Arendsz e ora a cuminza combersa cu otro pashent den sala di espera, y a bin haya sa e ora ey cu tin otro pashent wardando desde 5:00 pm. Pues e persona ey ta yegando 6 ora di wardando su turno.
“Esaki no ta e ImSan cu mi conoce,” Arendsz a bisa. “E trato a keda identico, pero un tardanza di 5 ora pa un mucha.”
Na final, Arendsz a considera cu ta inhusto pa laga un mucha keda warda asina hopi pa haya yudanza medico, y pesey el a dicidi pa bay cas bek cu e mucha sin cu el a wordo mira pa Docter y haya yudanza.
Segun Arendsz, e siguientemainta el a bay su Docter di Cas, kende a atende na nivel di emergencia y a dune e tratamento hunto cu e remedinan necesario pa asina porfin por a alivia e pober mucha di su dolornan.
Arendsz ta boga pa cambio wordo haci, pasobra loke a pasa siman pasa Diamars anochi ta inaceptable den e mundo di awendia.
