ORANJESTAD (AAN): Diahuebs anochi, interesadonan a aglomera den Aula di Universidad di Aruba pa asina scucha con Dr. Edward Cheung mes a relata e storia di un ingeniero Arubiano trahando pa NASA.
E anochi di lectura aki, organiza pa Center for Lifelong Learning (CLL) na Universidad di Aruba a resulta den un gran exito. Tur hende por a sinta comodamente pa asina scucha e cientifico Arubiano relata con el a cuminza di su educacion na Aruba, sigui pa estudionan na Merca y con el a yega te unda cu e ta awor trahando pa e space research laboratory di NASA na Goddard Space Flight Center.
El a papia di su proyectonan di e.o. e A.R.U.B.A. di circuito instala riba Hubble Space Telescope, y tambe di e hecho cu lo bay manda tambe ‘santo blanco’ di Aruba den espacio. Pabien na e organizadornan di CLL, Universidad, Dr. Cheung, y publico presente cu e exitoso lectura aki.
