Manera DIARIO a anuncia deliberacionnan cu Reino ta continua
*Castigo mas halto y cambio den areglonan di responsabilidad
ORANJESTAD(AAN)- Manera DIARIO a anuncia, Maart 2023 lo nifica encuentro entre Gobierno di Aruba y Gobierno di Reino pa yega na un solucion pa schrap COHO y yega na un compromiso pa pago di e debe cu Pandemia Covid-19 a nifica.
Ora papia di e peticion na Reino, mester tene cuenta cu tur aspecto. Pa loke ta trata e pandemia, mester mustra cu practicamente tur pais mester a haci debe importante pa nan por a enfrenta e situacion cu nan ta cera porta di nan economia, nan entrada, pa asina scapa bida di hende.
Cualkier hende cu no tin entrada mas diripiente, conoce e realidad di sigui biba sin placa pero mas ainda ora no a traha dam warda awa, pero a abusa di placa cu tabata tin y mas ainda, a crea debe pa paga den futuro.
Pues Aruba cu e solucion pa e debe di pandemia y COHO, no ta paga solamente di loke un virus a provoca, pero tambe pa loke abuso politico a produci cu e creacion di e debe nacional, mal gobernacion cu a exigi entrada di Hulanda na 2014 y fayo den creacion di un economia cu por a produci placa sin cinco strea na cielo scur.
Ora mira kico a pasa cu placa di Aruba, sin duda ta bini dilanti e holor di corupcion, cu ta e dolor mas grandi cu democracia conoce.
Mal maneho di placa y corupcion cu ta ladronicia di propiedad of a base di propiedad di Pueblo, mester conoce castigo.
Manera Aruba a palabra cu Hulanda, mester bini cu areglonan pa reemplasa COHO pero mester bini cu mas areglo pa habri porta pa un futuro nobo pa Aruba cu mescos cu henter mundo ainda ta confronta e inseguridad cu crisis tras crisis ta produci y cu ta motibo mas cu nunca pa politica reforma.
Gobierno Evelyn Wever-Croes tabata tin curashi di tuma medida y tuma pasonan necesario pa cambia rumbo di Aruba, cu a wordo hiba na e poz di estado di bancarota.
Awe Parlamento di Aruba mester traha riba reforma di leynan cu mester duna Pueblo e garantia cu corupcion ta conoce un final.
E responsabilidad den gobernacion mester wordo amplia. E hecho cu un Ministro tin responsabilidad total pa su Ministerio, mester wordo revisa.
Mester yega na un forma cu den Conseho di Ministro control ta cuminsa dor di atende cu e poder ministerial di personanan cu ta haya encargo gubernamental hasta sin a participa na eleccion, den cierto casonan.
Un Ministro Presidente mester haya mas responsabilidad pa su Gabinete y no por ta Presidente sin e derecho di por exigi tur cu ta forma parti di un Gabinete cu tin su nomber, pa pone su persona y e gabinete na haltura di loke nan ta haci.
A keda demostra den practica cu un persona cu bira Ministro, hasta sin participacion na eleccion, por haya un poder cu ta supera esun di Parlamento den maneho di placa, propiedad y funcionamento di e pais.
Parlamento mester bira mas agresivo den su control, pero ta un hecho cu mester corta poder ministerial cu ta fuente di posibilidad pa corupcion.
E momento a yega pa reforma cu mester nifica cu fruta putri den politica, no por afecta tur cuminda cu tin na un pais.
Mester di control y e participacion den trabou Ministerial mester conoce cambio ya cu a keda proba cu e sistema actual tin e buraconan necesario pa kibra ley na un pais cu tin ley como su base di funcionamento y pesey tin e nomber di Estado di Derecho, Estado caminda ley ta manda!
