Aruba mester wordo bon prepara pa apertura frontera cu Venezuela
- Barco Ruso den Noordzee ta adverti pa accionnan serio di spionahe
- Maduro ta un despota desespera sin placa pa vota den Nacionnan Uni
ORANJESTAD(AAN)- “Un aña despues di su inicio, e Guera na Ukraine ta mas peligroso cu nunca. Aruba sigur mester ta sumamente cuidadoso y mantene e estado di alerta pa su seguridad nacional, teniendo na cuenta e situacion mundial den cual ta keda confirma cu munda ta den un guera di petroleo.”
Esaki ta e posicion di informantenan di DIARIO, cu for di inicio di e Guera na Ukraine exactamente un aña pasa a mustra cu e final di e Era di Petroleo lo ta mucho mas peligroso pa paz mundial cu hende por a pronostica.
Petroleo tabata e entrada cu a crea podernan mundial nobo como fuente economico, pero ta tambe e motibo pa confrontacionnan internacional y sigur e arma pa mundo atende cu regimennan peligroso.
“Aruba awe mester tene diferente realidad importante na consideracion. Na prome lugar Aruba ta situa directamente den vecindario di paisnan Latino Americano, cu a beneficia enormemente di e Era di Petroleo, manera ta e caso cu Venezuela,” nan a mustra.
Turismo for di entre otro Venezuela como resultado di e Petro Dollar tabata un ingreso importante pa Aruba, cu a sufri di e crisis mundial di petroleo, cu a bira motibo di ciere di Lago.
E medidanan cu mundo a tuma contra dictadura na Venezuela, ta duna prueba di e forma cu mundo por uza sancion economico pa enfrenta dictadura manera e tirania di Nicolas Maduro.
Cu e problemanan nobo cu a presenta na mundo ta directamente relaciona cu disponibilidad di energia na mundo cu mester despedi di petroleo, ta keda proba tur dia.
Dictadornan di Venezuela a perde nan poder manera ta e caso cu Nicolas Maduro, cu practicamente a wordo agota dor di nacionnan liber sigur despues cu el a perde su baca di lechi Citgo na Merca.
Den e Guera na Ukraine, e necesidad di petroleo a haci cu sancionnan contra Venezuela a bira discutibel despues cu e lazonan comercial entre Rusia y paisnan liber, a bolbe na e situacion di tempo di Union Sovietico versus mundo liber.
Informantenan clave ta mustra DIARIO cu Aruba ta papia di apertura di frontera cu Venezuela, na momento cu e situacion mundial sumamente serio ta culmina.
E siman aki dilanti costa di Hulanda y Belgica a haya e prueba cu seguridad nacional mester haya tur atencion na momento cu practicamente confirmacion a wordo duna di e hecho, cu barconan di spionahe Rusia tabata dilanti costa di Hulanda y Belgica.
Segun informacionnan internacional, barconan Ruso lo ta practica spionahe dilanti costa di e paisnan Europeo, cu tabata permiti barconan Ruso den Noordzee pero acompaña pa barconan di Hulanda entre otro.
“Apertura di e frontera maritimo cu Venezuela ta wordo anuncia. Mester adverti cu Aruba mester ta sumamente bon prepara na e momentonan aki, cu mundo ta confronta un climax di e crisis na Ukraine pero tambe climax di e situacion na Venezuela,” a wordo indica.
Ayera mundo liber den Nacionnan Uni a vota pa exigi un fin di e guera cu Rusia a start cu Ukraine.
Venezuela no por a vota, pasobra tin un sancion contra Venezuela cu no a paga su contribucion na Nacionnan Uni pasobra Nicolas Maduro no tin placa pa paga y debe Nacionnan Uni 76 Miyon Dollar.
Gobierno Biden a prolonga e permiso pa e compania Mericano Chevron produci petroleo na Venezuela. E petroleo aki lo bay Merca tambe, pero ta causa mal contento cerca companianan Mericano, cu ta papia di favoritismo di Chevron dor di Presidente Biden, cu segun informantenan no por stop Venezuela di sigui entrega beneficio economico na Iran, cu mescos cu Maduro ta sostene Putin y Rusia.
Informantenan ta mustra satisfaccion pa e hecho cu lo ta na Mei 2023 lo habri e frontera cu Venezuela pero a indica pues cu den e situacion mundial actual, mester prepara poblacion di Aruba debidamente riba e peligronan tambe cu ta existi y lo existi cu apertura di e fronteranan.
E explosion di problema social na Venezuela ta continua y segun informantenan ni e milager cu Chevron por sigui genera placa pa medio di su contracto cu PDVSA lo no yuda.
Inversionnan di Iran ta continua na momento cu sucesonan manera e spionahe dilanti costa di Hulanda y Belgica ta haya atencion mundial y ta bati alarma grandi.
“Maduro ta man mara enfrente Rusia. E ta uno di e defensornan directo di e accion di Rusia na Ukraine. Aruba mester tene cuenta cu e realidad aki y tur Arubiano mester tene cuenta cu nan seguridad personal y e seguridad nacional di Aruba den un crisis mundial cu ta bira cada rato mas peligroso,” informantenan a indica.
