ORANJESTAD (AAN): Den e periodo aki na September, na Colegio EPI algun studiante di e opleiding Sociaal Pedagogisch Werker tin como tarea pa diseña, decora y muebla un centro di cuido pa mucha.
Tur esaki teniendo cuenta cu e metanan di les y tambe exigencianan cu tin den e documento di “Kwaliteitseisen kinderopvang Aruba”.
Recientemente Kimberly Tromp di “Your designer Kim” a bishita studiantenan durante les. Di e forma aki, Kim a suministra nan un monton di tips y informacion di kico pa tene cuenta cune na momento di sketch un lugar, ki color pa usa, cua material ta adecuado y hopi importante di con pa percura pa siguridad.
DIARIO a compronde cu Kim ta un ex-studiante di Colegio EPI, unit C&T Bouwkunde. Despues di a caba su estudio na Hulanda, Kim ta eherciendo su profesion como Architectural Designer na Aruba. Sigur un inspiracion y motivacion pa studiantenan actual.
Di parti di Colegio EPI, nan kier bisa Kim masha danki pa su bishita y informacion brinda.
