Fase 4 ta canando bon
ORANJESTAD (AAN): E trabaonan riba Fase 4 di e renobacion di Irausquin Boulevard net dilanti Hotelnan Highrise, ta bayendo den bon direccion.
DIARIO a compronde cu ya caba nan a kita e Asfalt completo di e Fase 4 y awor ta ocupa ta cobando pa asina cuminsa pone e tubonan necesario cu ta pasa bao di e caminda.
Manera a ser publica caba, e Fase 4 aki lo dura 11 siman pa motibo cu e distancia ta mas largo cu e otro fasenan y tin mas tubo cu mester worde poni. DOW a bisa cu tin di tene cuenta cu esey, y asina cu haya mas update, lo bay informa pueblo di esaki.
Recordatorio cu e area ta un area di construccion y no ta permiti ningun persona no-autorisa den e area.
Atrobe DOW ta indica cu durante construccion, publico por staciona vehiculonan na banda di caminda y pero NO riba e caminda.
