Minister di Husticia, Rocco Tjon:
ORANJESTAD (AAN) – Minister di Husticia, señor Rocco Tjon, a yama un rueda di prensa Diahuebs mainta, den cual tabata presente tur e stakeholders di e cadena di husticia: Minister di Husticia, Procurador General di Aruba, Fiscal Mayor, Director di Veiligheidsdienst Aruba y Alto Comisario.
Minister Tjon a elabora tocante e tema di Seguridad y Orden Publico. E dignatario a bisa cu e motibo pa cual a yama e conferencia di prensa aki, tin di haber cu hopi pregunta cu a yega cerca nan, na top di husticia, mirando e sucedidonan e ultimo dianan aki.
“Hopi pregunta si ta safe pa bay atende diferente actividad cu tin mirando cu nos tin un temporada hopi druk nos dilanti. Pa e motibo ey nos a haye bon pa yama e conferencia di prensa aki pa nos por contesta tur preguntanan cu tin di miembronan di prensa, y di e forma ey ta brinda transparencia pero tambe pa evita mal interpretacion” e mandatario a señala.
“Como top di husticia nos tin un responsabilidad, pa garantiza seguridad y orden publico pa Pais Aruba, pa tur hende, los si bo ta di acuerdo cu husticia of no, nos tin e responsabilidad y tarea pa garantiza seguridad pa tur hende”, e dignatario a reitera cu enfasis.
“Y mirando tur e cantidad di preguntanan cu a yega cerca nos, nos a haya necesario un rato pa nos splica tambe cu e topico aki nos a delibera riba dje den asina yama ‘Justitieel veiligheidberaad’ caminda tur e top di husticia ta bin hunto”, Minister Tjon a relata.
El a agrega cu mirando e acontecimentonan di e dianan tras di lomba, como top di husticia nan ta asumi e responsabilidad aki tambe.
“Y nos kier informa tur hende cu tur preparacion pa garantiza seguridad pa tur actividadnan nos dilanti, a ser tuma, manera semper”, Minister Tjon a subraya.
Kiermen, pa loke ta trata e parti ey, no tin ningun diferencia aworaki. E dignatario a acentua cu semper e preparacionnan aki ta wordo tuma door di Cuerpo Policial, den e caso aki den colaboracion cu Ministerio Publico, pasobra ora ta trata actividadnan grandi caminda mester garantiza orden publico, obviamente tin palabracionnan ta wordo haci entre KPA y OM, pa e manera con e ta bay sosode y esaki ta igual na e añanan anterior.
