ORANJESTAD (AAN): Tabata Diasabra den weekend pasa, cu un detenido a huy for di e facilidad di Guarda nos Costa.
Ta trata di e Venezolano di inicial C.P.T.
Segun Sr. Kramers kende ta dirigi Guarda Nos Costa, riba Diahuebs e persona ey su rol di fugitivo a caba, ora cu personal atento di Guarda nos Costa a logra gar’e den area di Sero Pita. No ta trata aki di djis un ilegal, sino mas bien un ex-preso kende a caba di sinta un castigo na Prison di KIA pa a tira atraco arma riba e isla.
Awo ta cla pa expuls’e bek pa Venezuela. E diferencia entre deportacion y expulsion ta como lo siguiente. Cu ‘deportacion’ e por regresa den algun aña back. Cu ‘expulsion’ e no por drenta e isla nunca mas.
Pero awor pueblo por nota, e “peso” di e ilegalnan cu ta wanta den e facilidad pendiente nan expulsion.
Tambe Diahuebs anochi a logra detene un otro persona den area di Bubali, cu a huy for di Guarda nos Costa na aña 2019. Ta trata di un Dominicano, conoci como G.D. Rubio Rodriguez. E ta den detencion na GNC pendiente su deportacion awor pa Republica Dominicana.
Segun Sr. Kramers, di e forma aki Guarda nos Costa, uzando tur nan ekiponan y personal bon entrena y prepara, a logra trece dos fugitivo back aden. Esaki pasobra nan a burla di e reglanan di Guarda nos Costa y di nos leynan local.
