E no ta kere cu e responsabel mester wordo laga bay cas:
ORANJESTAD (AAN) Edwin Willems, yiu homber di Josely Paulina Vasquez-Gonzalez, victima fatal di e accidente cruel di Hit & Run na entrada di Renaissance Mall, den e prome fin di siman di Januari 2026, ta duna su reaccion tocante e conferencianan di prensa reciente cu e famia di e persona implica ta duna.
Edwin a cuminza pa bisa cu awe e tey pa saca cara di su mayornan, y husticia e ta pidi pa su mayornan. E famia di e persona implica ta papia cu nan ta hende decente, pero ni un palabra di sorry nan no a duna na e famia afecta te awe, tocante e sucedido.
“Mi no ta buscando un sorry pasobra esey lo no trece mi mama bek, pero ora bo ta haci un fout, un sorry ta na su lugar, un sorry ta mustra ki tipo di persona bo ta. Mirando cu no tin ni un tipo di empathy na nos sernan keri, y tampoco na nos famia, nos tampoco no lo tin ningun clase di empatia cu e acusado.”
“Den caso Pro-Forma anterior mi no a wak ningun forma di arepentimento of duele, di e situacion cu el a causa. Al contrario, tur fout nan a purba tira riba e victimanan, treciendo rabia den comunidad, y mas dolor den e famia y amistadnan.”
“Mi no sa cuanto onderzoek mas nan kier haci caminda ta nan mes a sali publica e video pa tur hende wak. Tin camara den henter boulevard, nan ta papia di psicologo unda ami sa, e prome diez dianan cera el a haya psicologo cuater biaha. Y te dia di awe, mi no cuanto biaha el a haya psicologo.”
Ami, despues di seis luna mi a haya mi prome session di sicologo y si nan kier bay den e direccion ey di play loco, e ora ey nos ta bay pidi via nos abogado, pa duna e juffrouw TBS den su sentencia. E victimanan real ta e defuntonan y nos famia, cu a keda cu e dolor inmenso.
Mi yiunan cu ta puntra tur ora pa nan wela, y un di nan a keda sinta y tambe mester di un psicologo. Esey ta e daño cu e juffrouw a ocasiona nos, y mi no ta kere cu ta na su lugar cu e por bay cas pa tur e añanan aki, pa tur e daño cu el a haci”, Willems a manifesta.
