Ex docente Evert Bongers a conta parti di e historia di Colegio Arubano pabao y pariba di brug

ORANJESTAD (AAN) -- Meneer Bongers, ex-docente di Frances na “Colegio Pariba”, durante e ceremonia unda oficialmente Colegio San Nicolas a haya e nomber di Colegio

Nigel Matthew, den su disertacion a bay bek den tempo na aña 1977, kiermen 44 aña pasa, pues hopi tempo atras, “cu hopi awa a pasa abao di de brug”, manera Bongers a expresa.

Y papiando di pabao di brug, el a conta cu Colegio Arubano ta existi desde aña 1959 y na 1962 e edificio actual na Vondellaan a wordo construi y ocupa.

Ya na añanan 60 tabata wordo papia di un Colegio pariba di brug, y nan kier a lanta un HBS na San Nicolas, tambe.

E problema pa e muchanan di pariba di brug tabata cu nan tabata tin cu lanta hopi trempan, madruga banda di 5 or, pa bay cu e Viana bus, cu hopi hende no ta corda di dje; pero tabata existi un compania Viana, cu tabata transporta e muchanan pa Colegio Pabao, y despues di scol tabata tin cu bay bek San Nicolas y e tabata yega pa 4 or of mas laat na cas.

E dia di traha un Colegio na San Nicolas a bin up, pero no a papia mas di dje, te aña 1977 cu e Bestuurscollege a dicidi cu mester bin un dependence di Colegio, pariba di brug.

Evert Bongers a expresa cu no tabata eigenlijk cu tabata tin eleccion, pasobra manera tur hende sa ora bin eleccion, tur hende tin causa pa duna hopi atencion na San Nicolas. E proyecto aki tabata Colegio Dependence di Colegio Arubano, y na aña 1977 cu e rector di e tempo ey, señor Richard Harms (qepd) a inicia cu e proyecto.

El a agrega cu esaki a bay hopi lihe y no tur hende tabata convenci cu ta bay logra pa lanta un scol den apenas tres of cuater luna, pero nan a pidi un teken leerar hoben, cu a lanta na San Nicolas y tabata alumno di e mesun scol cu nan a bay ocupa, Don Bosco School bieu.

“Na 1977 nan mester a lanta den mas of menos tres pa cuater luna un scol pariba di brug den e edificio bieu di Don Bosco School, cu tabata un dump. Y e mesun edificio awo, ta den un estado deplorable”, meneer Bongers a remarca.

El a conta kico a sosode den politica na e momento ey ora cu e lider di MEP señor Betico Croes no tabata contento cu nan a lague pafo di e Gobierno Central y el a dicidi di lanta contra Curacao. El a cera tur conexion economico y social cu Curacao, no tabata tin contacto ni importacion pues tur cos a cay plat ya cu e asunto a bay asina leu cu gobierno central a manda riot polis riba Aruba. Esaki a sosode net den luna di Augustus’ 77 cu tur cos a cay afo. No tabata tin coriente, nan a papia di Augustus scur e dianan ey. E situacion a resolve como 10 pa 12 dia despues, pero net e momentonan ey mester a caba cu e organizacion di Dependence Colegio San Nicolas, mientras waf tabata cera y, DOW full plat. E dia cu scol a habri bek, dia 14-15 di Augustus’77 San Nicolas no por a cuminza cu su Colegio. Apenas dos siman despues por a cuminza cu e lesnan, y na un manera hopi primitivo, pero tur mucha biba pariba di brug mester a bay Colegio San Nicolas, hasta si tabata pa un aña so. Pero Colegio San Nicolas a bin pa keda, y meneer Bongers tambe a bin pa keda como docente eynan. El a mustra potretnan di e muchanan cu a studia den Colegio Pariba, e diez prome añanan. Pa deterioro di e edificio mester a muda dos biaha pa otro localidadnan cu tampoco a resulta. El a agrega cu e historia di Nigel Matthew no a caba na 87. Diez aña despues el a haya pa yamada pa bira co-Rector na Oranjestad (Colegio Pabao) y na 1992 a surgi un cambio di Nigel Matthew a bin bek San Nicolas, pa otro diez aña. Di 1992 te 2002 el a cumpli tur su carera na Colegio y despues a baha cu pension.