ORANJESTAD (AAN)- “Den e vision di Social Crisis Plan, e meta principal ta duna seguridad den e bida di e mucha y e hoben, desde su nacemento te ora e bira un adulto
responsable”. Asina Glenda Hernandez, directora di Departamento di Asunto Social a indica den su update riba e proyecto aki.
Hernandez a menciona cu esaki ta un meta hopi grandi y compleho y por wordo acapara mirando den e bida di un mucha. Pero, en todo caso, por hacie mirando door di e bida di un hende, wak e riesgonan y purba, como gobierno, como famia, como mayornan, mitiga e riesgonan ey.
Hernandez a expresa cu esaki ta nan approach y eynan ta wak te unda nan por uza factornan pa proteha e mucha pa yude pa e bin dilanti.
“Ora un mucha ta desvia, no mande cas bisa cu e no a logra. Bo ta yude, y bo ta mira cu hopi biaha muchanan asina ta progresa enormemente, pasobra nan a pasa den mal situacion, pesey si bo wak muchanan cu a desvia yuda nan pa nan bay bek riba e bon caminda. Hopi vez nan ta logra toch den e di dos biaha”, Hernandez a subraya.
El a reitera cu e meta principal di Social Crisis Plan ta pa cada mucha y hoben ta sigur na Aruba. “Esey no kiermen cu algo no por pasa mañan of otro siman, pasobra e riesgo semper tey.
“Pero locual nos ta purba haci ta ki sorto di riesgo un mucha ta enfrenta riba diferente lugar, unda e ta hunga, ta biba, ta haci su amistadnan, ta topa cu hobennan mesun cos, anto nos ta purba di mitiga e riesgonan ey”, Glenda Hernandez a reitera.
“Ora di papia di violencia contra mucha, mester wak nos leynan, bo comunidad, bo balornan, cas, scol, y asina tanto nivel, pa bo por ta efectivamente bezig”, Directora di DAS a subraya, pa conclui e parti aki di e puntonan di riesgo.
