Ex-alumno di Colegio EPI yudando e studiantenan di enfermeria

ORANJESTAD (AAN): Recientemente na Colegio EPI, e grupo di VP4-3A di verpleegkunde opleiding a haya un tremendo presentacion di broeder Juelson van der Biezen, Officier van dienst (OVD), di ImSan.

   E presentacion aki tabata regardando e Professionele Communicatie (PCOM) ‘cuido sin muri’.  Van der Biezen na ImSan tin amplio experencia den cuido den emergencia. Broeder Juelson a gradua como enfermero na Colegio EPI y a specialisa como ambulance verpleegkundige y Maatschappelijke gezondheidszorg (MGZ-AGZ). Un persona cu hopi experencia pa atende situacionnan hopi critico y inespera.

   Studiantenan a haya un amplio ehempel cu nan lo por uza den practica ora nan haya nan mes den un situacion critico. Theoria ta splica e proceso pero cada situacion ta keda diferente y ariba un ambulance e verpleegkundige tin cu tuma decision den situacionnan critico, agudo y independiente, segun nan capacidad y protocol.

   E studiante mester por reconoce e diferencia entre: morto natural, morto no-natural, morto cerebral, y morto clinico.  Pa por haci esaki ta importante pa por observa hopi bon pa por determina si e persona ta duna señal di bida, cuminsa reanima of ki ora ta  yama Dokter pa constata morto y ki ora no mishi cu un pashent pa no stroba investigacion.

   Colegio EPI ta gradici broeder Juelson pa e disponibilidad pa a bin duna e studiantenan aki un  presentacion pa prepara nan y haci nan conciente cu bon nan conocemento den e teoria mester ta pa por observa y tuma e decision corecto na e momento corecto.

   Cu ariba caya e responsabilidad ta mas grandi cu nan mester tuma decisionnan y tuma accion segun protocolnan di Ambulance cu ta cay bao tarea di un enfermera cu sigur tabata uno educativo y reflectivo.