ORANJESTAD (AAN): E autor di origen brasilero y residente na Aruba, Claudia Daher,
a logra un reconocemento internacional importante despues di a wordo nombra “Distinguished Favorite” den e prestigioso ‘Independent Press Award 2026’. E premio a wordo otorga den categoria di Ciencia Ficcion: Existencial & Resiliencia Social, pa su novela “R.A.T.S: Revolutionary Army of Teens – We Are One”.
Como parti di e ceremonia oficial, Daher lo cana riba e tapijt cora diasabra awor pa acepta su medaya. Despues, e celebracion lo continua na Times Square, New York, diadomingo 26 di april, unda su logro lo wordo presenta riba un billboard den un programa special dedica na excelencia literario, coordina pa editor Ted Olczak di Printed Word Reviews.
E reconocemento aki ta sigui despues di un entrevista exclusivo cu lo sali den edicion di mei di e revista. ‘Independent Press Award’ ta reconoci como un di e premionan mas respeta pa autornan independiente na mundo, cu participacion di escritor y editorialnan for di varios continente. E titulo “Distinguished Favorite” ta reserva pa obranan cu ta destaca pa nan calidad, originalidad y impacto.
Un storia cu mensahe global
E novela “R.A.T.S” ta dirigi na lectornan di 13 aña bay ariba y ta trata topiconan manera identidad, union y responsabilidad colectivo den un mundo dividi. E storia ta combina profundidad existencial cu relevancia social, promoviendo respet entre cultura, consciencia ambiental y balornan familiar.
Publica pa Pegasus Publishing y edita cu colaboracion di Kevin Anderson & Associates, e buki ta disponibel internacionalmente via plataformanan manera Amazon, Barnes & Noble y otro distribuidor grandi.
Mas leu cu literatura, e proyecto tambe ta inclui e cancion original “We Are One”, co-skirbi pa Daher y su yiu Keith, y interpreta pa e musico Arubiano Miguel Genser. E pieza musical ta reforsa e mensahe central di unidad: si Dios ta uno, humanidad tambe ta uno.
Un logro grandi den un competencia global
Edicion di 2026 di e premio a conta cu participacion di autor y editorialnan di paisnan manera Australia, Canada, Alemania, India, Japon y Merca, entre otro. Miles di inscripcion a wordo evalua pa un panel internacional.
Segun Gabrielle Olczak, president di e premio, e ganadornan di e aña aki ta representa e crecemento fuerte den sector independiente: “Bos independiente no ta solamente un alternativa mas; nan ta lidera innovacion literario na nivel global”.
Trayectoria di un autor inspira
Claudia Daher, kende ta biba na Aruba pa mas di 35 aña, ta un escritora y artista visual cu su trabou ta enfoca riba hobennan, etica, spiritualidad y futuro di humanidad. Su estilo ta combina creatividad cu responsabilidad social y un perspectiva global.
Den su novela, ambienta na aña 2040, un grupo di hoben lidera pa protagonista David mester enfrenta un menasa extraterrestre cu kier horta awa di tera. Cu guia di un misterioso wega di realidad alternativo crea pa su welo, nan ta forma un aliansa mundial pa salba humanidad.
E storia ta integra temanan moderno manera inteligencia artificial, cambio climatico y union global, presentando un mensahe claro: meymey di crisis, conocemento, curashi y union ta esencial, pasobra hunto, “We Are One”.
Tocante e premio
‘Independent Press Award’ ta un programa anual cu ta honra excelencia den publicacion independiente, habri pa autornan autopublica, editorial chikito y universidadnan na tur part’i mundo.
Cu e reconocemento aki y su presencia na un di e escenarionan mas emblematico di mundo, Claudia Daher ta pone Aruba riba mapa literario internacional, inspirando un generacion nobo di lector y creadornan.
