Evento ‘Pa un bon comienzo di aña 2026’ tabata un programa basta ambicioso

Señor Mirto Lacle cu relato extenso:

ORANJESTAD (AAN) Siguiendo cu e entrevista cu Matutino DIARIO, tocante e evento cu a tuma lugar na Biblioteca Nacional Oranjestad, Diahuebs anochi, pa un bon comienzo di aña 2026, señor Mirto Lacle a trece dilanti algun persona cu e kier a promove nan producto.

   Un di nan ta Friedrich “Chibi” van der Hans, autor di e conocido y tan gusta revista “Bacchanal”. Chibi a papia di Bacchanal, y tambe di e dos tomonan cu el a produci, trahando tanto aña di carnaval, pa  pone nan den potret y aworaki den un buki. Kiermen, ta un programa basta ambicioso.

   Señor Lacle a mustra un buki di Hulanda, unda cu Profesor Michiel van Kampen cu te recien a ocupa e Catedra di Nederlandse-Caraibische Letteren na Universidad di Amsterdam, y cu a duna les tanto na studiantenan Surinameño como di Antiyas, riba Literatura di Suriname y di Antiyas.

   Ademas a haci referencia na Francio Guadeloupe (oriundo di Aruba) cu ta Catedratico Titular di “Public Anthropology of Kingdom Relations” pa asuntonan relaciona cu Reino, na KITLV-KNAW y na Universidad di Amsterdam.

   Tambe el a presenta un cuadro di e docente Wouter van Romondt cu ta duna les na Universidad di Aruba, di pinta y skirbi y tambe les di ‘Kiuma’ cu ta cultura y comunidad, y ademas el a presenta un cuadro cu ta “Mitologia di e Isla”. “E ta cuminza cu Aruba, anto nos a bay den nos antepasadonan, con el a uza e pinturanan pa expresa loke ta e indigenanan. Ademas di e cuadro el a presenta un tayo blauw cu ta representa lama Caribe, unda el a lanta y di unda e hendenan a yega y tur loke ta banda di lama caminda el a haci hopi investigacion. El a duna un representacion simbolico di e temponan di antaño cu diferente simbolo magico” señor Mirto Lacle a splica.

   Señor Lacle a indica cu den e anochi aki a pasa un video cu nan a yama “Female Aruban’s musical Icons”.

   “Ta trata di icononan musical Aruba cu tur ta sernan femenino. Nan ta Digna Lacle Herrera, Meybelline Arends-Croes, Tica Giel, y Carmen Herrera” señor Lacle a comenta.

   El a duna elogio tambe na e grupo musical cu a toca un Dande, cu ta un di e tradicionnan grandi di Aruba.