Manera DIARIO a pronostica for di 2023 a bira realidad na 2024
*Representacion di Pueblo a conoce un atentado historico ayera
*Traicion di acuerdo di Gobierno a rementa ayera manera anuncia
ORANJESTAD (AAN) — Pa por informa Aruba debidamente y adverti pa trampanan cu ta wordo poni contra bienestar y interes di Pueblo, mester di periodismo conciente di loke ta biba den Pueblo.
Na momento cu e prome seis lunanan di 2023 a pasa pa historia, DIARIO a cuminsa adverti lectornan pa loke tabata wordo fabrica den seno politico di epais na caminda pa eleccion 2024.
DIARIO a bay asina leo na mustra na e momento cu ripiticion di loke a pasa cu Aruba na 1985 tabata riba programa y intentonan pa cera porta pa un victoria electoral mereci di e Gobierno Evelyn Wever-Croes, tabata wordo haci.
Informantenan clave di DIARIO den tur sector di comunidad Arubano, tabata informa di strategianan cu a wordo prepara pa por evita cu durante eleccion 2025, victoria atrobe lo tabata den man di partido dirigi pa Evelyn Wever-Croes.
2024 a bira un aña di prueba increibel pa e dirigente Arubano mas ainda ora sui sossten no a keda limita na Aruba pero a bira internacional y hasta di Reino Hulandes cu duna e stemadvies historico cu e maneho di Gobiernonan di Evelyn Wever-Croes, mester haya continuacion.
Mas e sosten local y internacional tabata crece pa Gobierno, mas intentonan pa destrui su caminata exitoso pa eleccion tabata wordo prepara y DIARIO a mustra, ya prome cu Gobierno a cay, cu tabata tin ruido straño na firmamento politico di Aruba.
Na un forma cu a bay contra tur regla di decencia politico y regla den e leynan no skirbi di acuerdonan politico pa gobernacion, Raiz cu tabata den problema interno serio, a prepara e caida di Gobierno Evelyn Wever-Croes, cu mester a habri e caminda pa evita loke ta na caminda, cu ta un sosten historico di Pueblo votador di Aruba pa Gobierno Evelyn Wever-Croes.
Na momento cu DIARIO a wordo adverti di un campaña sushi pa mishi directamente cu e imagen di Prome Ministro Evelyn Wever-Croes y cu mester a rementa den Parlamento caminda mester a realiza un proceso cu mester a haci posibel pa Parlamento retira su confianza den Prome Ministro Evelyn Wever-Croes, kende asina lo a wordo forsa pa baha como Ministro Presidente, aunke ya e tabata demisionario.
DIARIO, conocedor di e base legal di Aruba a drenta den contacto cu expertonan riba e tereno pa entre otro busca e sosten legal pa loke a pasa cu Aruba caminda un Parlamento cu a wordo “ontbonden”, pues ta na caminda pa cas na forma prematuro, por manda un Gobierno demisionario cas.
Tristo den henter e caso aki ta, cu den seno di Gobierno Evelyn Wever-Croes, mr. Geoffrey Wever a cambia di partido pero a keda cu e posicion cu e tabata tin como Ministro di Raiz, cu cual MEP a cera un acuerdo di gobernacion, mientras ya e ta parti oficialmente di otro partido.
Un turbulencia politico enorme a wordo crea pa Prome Ministro Evelyn Wever-Croes y DIARIO imediatamente na momento cu a cuminsa susha su nomber cu e ponencia cu e ta mete den trabou di Husticia a mustra, cu pa atende e asunto aki mester informa na Ministerio Publico.
Ta bon pa aki enfatisa cu DIARIO ta tene su mes na reglanan legal cu ta mara periodismo.
Dia 5 di November tabata planea pa den un reunion di Parlamento, e bon nomber di mr. Evelyn Wever-Croes wordo susha cu e argumento cu e ta mete den trabou di Husticia, cu antayera a mustra riba e mentira cu e acusacion aki di e grupo di RAIZ, AVP, Miguel Mansur, MAS, Gerlien Croes a fabrica pa destrui e imagen politico e Prome Ministro di Aruba.
Husticia a haci su mes ora Procedor General di Aruba a desmenti e informacionnan falso di Miembronan di Parlamento di Aruba, cu a reduci e honor di Parlamento di e pais te na suela.
Ayera Aruba a hubila ora Prome Ministro mr. Evelyn Weber-Croes a entrega prueba na Parlamento di su integridad.
Tristo cu un figura manera Marisol Lopez-Tromp, cu a bira conoci for di inicio di su carera pa e cas di su wela, a trata na reduci e balor di Parlamento te na suela dor di pone un mata di bruheria dilanti Prome Ministro Evelyn Wever-Croes.
E Presidente di Parlamento cu contra acuerdo di gobernacion a wordo nombra, na careda a deshaci di e mata despues cu el a desmenti cu e reunion tabata pa aplasta Prome Ministro Evelyn Wever-Croes.
Ayera a bira un dia historico pa Aruba, caminda husticia a triunfa pa asina Aruba por sigui cana den direccion di un eleccion democratico, despues cu berdad a rementa den sala di Parlamento y a splica Aruba e trampa cu a wordo fabrica cu placa cu Pueblo ta entrega miembronan di Parlamento pa haci nan trabou!
