Modelo nobo di gobernacion a bira accion dirigi contra criminalidad
*Prome Ministro Wever-Croes a habri porta pa purificacion politico
*Presidente di Parlamento Vrolijk a asegura e estado di Ley y Orden
ORANJESTAD (AAN) — Gobierno Evelyn Wever-Croes tabata tin como su base di gobernacion e palabra “integridad”cu lamentablemente a bira hopi conoci den circulonan politico pero no a ricibi e splicacion debido pa asina henter Pueblo comprende kico ta base di maneho di e pais.
Un estado di derecho ta un estado caminda no ta simpatia y “good fellowship”ta dicidi con e gobernacion ta tuma lugar, pero caminda democracia ta bira realidad pasobra ta ley ta dicidi y nada mas.]
E persona cu no comporta segun regla, ta pone su mes directamente na peligro di wordo coregi y hasta persigui y pa asina democracia evita cu e bienestar di e persona cu no tin cierto podernan, wordo atrapa.
Democracia ta exigi un estado di derecho, cu ta basa riba integridad di un persona loke ta nifica cu un miembro di comunidad, sin distincion algun, mester tene su mes na ley.
Gobernacion di Aruba conoce tres poder y e tres podernan mester tene nan mes na e Orden di Ley, pues na loke Ley ta bisa pa asina derecho di tur por wordo defende sin distincion.
Integridad ta nifica cu e appel no ta putri, Integridad ta regla e comunidad a base di exigencianan di bon conducta y moral.
Prome cu e Leynan a wordo introduci, den gobernacion di e pais Aruba a wordo directamente afecta.
Continuamente DIARIO por ehempel a splica pakico pa motibo cu Gobierno Mike Eman a dicidi pa un gobernacion cu ta gasta placa di Pueblo sin bon maneho, Pueblo di Aruba ta sufri,
DIARIO a mustra cu esaki ta posibel pasobra hasta e miembronan di Parlamento di AVP durante gobernacion di Mike Eman, a duna e Prome Ministro man liber pa atende cu placa di Pueblo contra e Ley di Contabilidad, cu ta bisa con un gobernante mester atende cu placa.
Kico ta pasa si un Gobernante atende cu placa segun Ley, a bira visibel den e maneho cu a wordo hiba dor di Gobierno Evelyn Wever-Croes cu ta exigi pa hende tene nan mes na ley, paga belasting ora mester paga esaki y asina percura pa e pais por wordo goberna sin cu ta bay haci debe na otro pais.
Pues ta a base di Integridad, Gobiernonan Wever-Croes a hiba nan maneho financiero loke a haci cu awe henter Pueblo ta wordo beneficia.
Integridad ta e alma di democracia y ley pa uno ta ley pa tur.
Ta conoci cu den mundo politico, hopi bez den historia tabata tin caso dudoso. Por mira cu ta awor cu ta tene na e maneho di Integridad, politiconan cu comete eror, ta haya nan mes den problema y ta bay prison mescos cu tur otro hende.
E hecho cu tanto caso di politico awor ta bira obheto di e sector di Husticia, ta simplemente pasobra awor tin Ley cu ta exigi e politico, actua segun Ley, cu ta encargo directo di Parlamento di Aruba, cu ta goberna na nomber di Pueblo y protegiendo loke ta di Pueblo.
Pues Parlamento di Aruba mester di un dirigente capaz y fuerte cu Aruba sigur a conoce den mr. Edgard Vrolijk cu tabata coregi Miembronan di Parlamento pa evita cu Parlamento no ta comporta su mes manera mester ta pa e suma enorme cu Pueblo ta paga miembro di Parlamento pa traha na beneficio di Aruba.
Parlamento ta alma di democracia y ta traha Leynan na cual Hueznan tambe mester tene nan mes den nan funcion mescos cu Gobernador y hasta Cas Real.
Integridad ta wordo exigi den tur e ramonan aki mescos cu e ta wordo exigi na e ciudadano cu mester comporta su mes.
Si Polis mester detene un persona cu ta bay contra e regla pa no maneha un auto bou influencia di bebida, e mester detene un Miembro di Parlamento, un Ministro of hasta un Miembro di Corte di Husticia si nan kiebra Ley,
Esaki ta integridad cu awe ta visto na Aruba, caminda a base di e leynan cu Gobierno di Evelyn Wever-Croes a introduci, Polis ta bati na porta di politiconan tambe si nan no cumpli cu Ley.
Pa Status Aparte esaki ta nifica cu Aruba ta duna prueba cu e por carga e peso di autonomia, cu ta exigi cu tur hende ta tene nan mes na ley y cu ningun hende ta mas cu otro.
Durante e periodo cu ta termina e palabra “orden”, integridad, a bira realidad. Esaki a haci cu Aruba por a funciona a base di e reglanan democratico mas importante, cu a habri porta pa tur hende sin excepcion, tene nan mes na ley y asina entrega na futuro generacionnan un Aruba realmente democratico a base di bon funcionamento di Parlamento cu no ta un circo pero Voz di Pueblo cu mester ta basa riba respet. A base di bon gobernacion cu ta uza placa di Pueblo a base di bienestar di tur hende y cu tin reglanan di Husticia pa asina evita cu esun cu mas forza por destrui esun cu ariba cualkier tereno ta debil!
Integridad, e contenido real, a bira e modelo exitoso di gobernacion ehemplar di Aruba pero modelo enemigo, pa tur cu ta prefera kibra ley!
