Caso di Landsrecherche
- E tabata cu Zwangerschapverlof despues di duna luz
ORANJESTAD (AAN): Mas detaye a drenta di e investigacion hudicial den man di Landsrecherche cu a cuminsa desde cu den ultimo siman di October a detecta iregularidad na Departamento di Directie Infrastructuur en Planning (DIP).
A base di esey, hunto cu Departamento di Recurso Humano (DRH) di Gobierno a haci un investigacion tipo “feitenonderzoek”.
Ora cu e investigacion a finaliza y a analisa e resultado, a keda Departamento di DRH nada otro sino entrega keho na Landsrecherche.
Esaki a desemboca Dialuna mainta trempan, ora cu autoridadnan hudicial y Landsrecherche a yega na un cas na Rooi Afo. Ey ta e cas unda e Directora Interino di DIP ta biba, esta Marilynn Dirksen.
Na e cas aki di su defunto welo, Hues Comisario tabata observa e movimento di Landsrecherche, cu a confisca su Laptop Computer, varios USB Memory Sticks, y tambe su Smartphone.
Ministerio Publico a duna e caso aki e nomber ‘Moringa Zaak’, y ta enfoca rond di e hecho cu Marilynn Dirksen ta sospechoso di casonan di soborno, y tambe sospechoso di maluso di su funcion como Directora Interino.
E entrada hudicial na su cas na Rooi Afo a socede net riba e fecha di 4 di November 2024, cu ta e dia cu su Zwangerschapverlof a finaliza y cu e mainta ey e tin di bay labora. Su baby tin como 3 luna naci awor.
Dirksen ta ocupa e puesto di Directora Interino desde 2023, ora cu a schors e Director prome, esta ing. Haime Croes cu ta meti den asuntonan incorecto cu otorgamento di tereno. Marilynn Dirksen a lanta hopi stof na Januari 2024 ora inespera a bin cu regla nobo cu ta bay saca lista di Kavelnan pa Carnaval sin cu ta bay divulga nomber ni adres, bao pretexto di ‘privacy’. Eynan tambe tabatin algun hende cu a core punta ta kico tin di sconde. Pasobra bo ta djis habri buki di telefon y nomber di tur hende ta aparece eynan cu nomber y adres. Pakico haci druk anto.
E caso awor ta den man di Ministerio Publico. Gobierno a emiti un boletin pa bisa cu e Caso Moringa aki no ta envolvi Minister di Infra-structura mirando cu e proceso di otorga tereno a worde depolitisa (Minister no ta firma pa duna tereno) y e Minister no ta parti di e proceso, ni di e investigacion. E dirigencia di DIP ta sigui den man di sr. Ir. Robert Maduro, manera tabata e caso den ultimo lunanan.
